Pänceşämbe könne Omski şähär milli mädäni möxtäriäte aktivistları timer yullar vokzalında Qazannıñ yuğarı uqu yortlarında belem alıp, cäyge yalğa illärenä qaytıp baruçı Qıtay studentları belän oçraştılar. Oçraşu poyezd tuqtalıp torğan 15 minut waqıt eçendä genä barsa da, studentlar üzläre belän tanıştırıp, küp kenä sorawlarğa cawap birergä ölgerdelär. Ämma isäple waqıt tiz ütep kitte, ayırılışırğa waqıt citte. Poyezd quzğalğanda studentlar cır başlap cibärdelär. Poyezd kitkännän soñ ozatuçılar taralışırğa aşıqmadılar. Tatar möxtäriäte aktivistı Raziä apa Mäcitova küp yıllar elek Qıtayda ber tuğanı yäşäwe, anıñ xaqında studentlardan soraşuı turında söyläp aldı.
Qıtay studentları şul uq könne Novosibirskiğa barıp cittelär. Anda alarnı Ölkä tatar mädäniät üzäge aktivistları qarşıladı. 2 iyün könne studentlar öylärenä qaytıp citäçäklär.
