Varşaw. Yewropa Berlegeneñ iminlek wä tışqı säyäsät öçen cawaplı yuğarı wäkile Javier Solana, nämzät illärneñ Ğiraq mäs’äläsendä Quşma Ştatlar yağın aluwı, alarnıñ kiläse yıl mayında Berlekkä quşıluwına berniçek tä qomaçawlamayaçaq dip belderde. Nigezdä Könçığış Yewropadağı nämzät illärdän torğan 10 däwlätneñ Bagdadqa qarata säyäsät mäs’äläsendä açıqtan-açıq Waşingtonnıñ qırıslığın yaqlawı, köç qullanuğa qarşı çıqqan Fransiä häm Germaniäneñ rizasızlığın uyatqan ide. Fransiä prezidentı Jacques Chirac, Quşma Ştatlarnı yaqlawları öçen nämzät illärne tirgäp, bu alarnıñ Yewropa Berlegenä quşıluwına zian kiterä ala dip belderde. Solana isä bügen Pol’şa başqalasında, Berlekne kiñäytü şundıy möhim eş ki, anı tuqtatu yäisä kiçekterü hiç mömkin tügel digän süzlär äytte. Premyer-ministr Leszek Miller belän oçraşqannan soñ ul, qabul itü kalendare inde bilgele, häm bu xaqta kileşü aldan qaralğança, kiläse ayda Afinada imzalanaçaq dip belderde.
