Paqstannıñ Qabuldağı wäkile, Äfğanstan törmälärendä totılğan Al-Qaida häm Taliban öçen köräşkän böten Paqstan totqınnarı İslamabadqa tapşırılaçaq, dip belderde. Totqınnar Äfğsnatnda 2001nçe yılda Taliban xakimiäte bärep töşerelgännän birle qala.
Paqstan ilçese Rustam Shah Mohmand totqınnarnı Paqstanğa tapşıru waqıtı bilgelänmäde dip xäbär itsä dä, Äfğanstan prezidentınıñ matbuğat wäkile Fazer Aqbar, totqınnarnı tapşıru eşläre kiläse atnada başlanır, dip belderde. Paqstan wäkile monıñ öçen Äfğanstanğa üz räxmäten belderde häm bu ğamäl, Qabul belän mönäsäbätlärneñ cayğa salınuına yardäm itäçägen äytte.
2001nçe yılda Talibanğa Amerikan köçlärenä qarşı torırğa yardäm iter öçen Äfğanstanğa meñlägän Paqstanlı kilde. Alarnıñ kübese kire Paqstanğa qaytıp ölgerde, yözlärçä keşe qulğa alındı.
Paqstan şulay uq üzeneñ könyağındağı Karaçi töbägendä maxsus säwdä zonası buldırıp Äfğänstanğa tawarnıñ kitüen ciñeläytüne täqdim itte. Bu ğamäl Äfğanstannı tözekländerüne tizlätäçäk häm ike il arasında säwdä xezmättäşlegen nığıtaçaq. Uzğan yılda Äfğanstan belän Paqstan arasında säwdä 107 million dollarlıq bulğan, annan aldağı yılda bu ike tapqır azraq ide.
