Britan xärbiläre Ğiraqnıñ köyağında tormış elekke ezenä qayta bara, dip xäbär itä. Läkin Basra şähäre tiräsendä wazğiät kierenke bulıp qala. Anda Britan ğaskärläre belän Ğiraq köçläre arasında kön sayın qatı bäreleşlär däwam itä. Kapitan Al Lockwood Umm Qasr häm Zubayr şähärlärendä tınıçlıq urnaşa, dip belderde. “Ğadäti tormış kire qayta. Kibetlär, mäktäplär açıla. Uzğan töndä Umm Qasrda elektr utı birelde. Normal’ tormış urnaşa bara häm xalıq şunı añladı-bez alarnı yawlap alırğa kilmädek-bez alarnı azat itergä kildek”, dide britan xärbi wäkile kapitan Al Lockwood.
Amerikan xärbiläre birgän mäğlümatkä qarağanda Bağdad yanında Ğiraq Cömhüriät saqçılarınıñ safları kimegän.
Tönyaq Ğiraqta da bombalaw däwam itä.
Könbatış televideniä kanalları (CNN häm BBC) kiçä Kirkuk şähärennän qaçqan Ğiraq ğaskärläre töşerelgän tasmalarnı kürsätte. Tönyaqtağı şähärlär bügen dä utqa totılğan.
Ğiraq Mäğlümat ministrı Mohammäd Said al-Sahaf , “tere qalqan” bulıp suğışqa qarşı torırğa äzer bulğan ixtiyarılar tulğan 2 Ğiraq avtobusın Amerikan xärbi oçqıçı utqa tottı, berniçä keşe yaralandı, dip xäbär itte. Bu mäğlümat başqa çığanaqlarda äle raslanmağan.
Britaniäneñ tışqı eşlär ministrı Jack Straw-Ğiraqnıñ yaña citäkçelegen bilgelär öçen xalıqara konferensiä uzdırırğa çaqırdı. Yaña Ğiraq xökümäte Berläşkän Millätlär ximayäsendä uzaçaq cıyında saylanırğa tieş, dip östäde Straw.
Amerikan maxsus ğaskärläre häm Ğiraq kördläre xärbi köçläre Tönyaq Ğiraqta Al-Qaeda belän bäyläneş ebulğan terror oyışmasın yuq itüe turında xäbär itte. Ansar al-İslam terrorçılar törkemeneñ küpçelek äğzase üterelgän, dip xäbär itelä
Yevropa Komissiäse kiçä Najaf şähäre yanındağı tikşerü noqtasına kisätülärgä qaramastan yaqınlaşqan maşinadağı 7 keşeneñ-küpçelege xatın-qızlar häm balalarnıñ atıp üterelüe uñayınnan alarnıñ ğailäläreneñ qayğısın urtaqlaştı. Komissiäneñ matbuğat wäkile Reijo Kemppinen, mondıy “qotoçqıç faciğa” -berdän ber oçraq tügel, suğış alıp baru texnologiäläre ni qadär alğa kitkän bulsa da mondıy yalğışlarnı buldırmağan suğış barıber bula almıy, dide. Kempinnen ike tarafnı da tınıç xalıqqa höcüm itmäskä, suğış totqınnarına Geneva konvensiäse nigezendä mönäsäbät kürsätergä çaqırdı.
