Ğiraqtağı suğıştan soñ Amerikanıñ farsı qultığı töbägendäge tä'sire köçäyäçäk, dip beldergän Tatarstan prezidentı Mintimer Şäymiev “İnterfax” agentlığı xäbärçesenä. Süz Amerikanıñ säyäsäten xuplaw yäki xökem itü turında barmıy, Tatarstan citäkçeseneñ fikerendä xäzer barğan suğışnıñ iqtisadi, säyäsi näticälären küz aldına kiterergä omtılış kürenä. Mintimer Şäymiev bu intervyusında suğış alıp baru kapitalnıñ çın yözen kürsätä, dide. Ämma şunısı açıq: xäzergä berkem dä üzeneñ matdi-iqtisadi mänfäğätennän waz kiçmi. Änä bit, Vladimir Putin da AQŞnıñ ciñelüe Rusiägä fayda kitermäyçäk, dide. Ğomumän alğanda, Tatarstanda suğışnı yaratmıylar. Çeçnyada bulsınmı, başqa cirdäme, suğış zur bäla. Läkin Qazanda Ğiraq suğışın möselman illärenä qarşı höcüm dip sanamıylar. Ufa üzägendä “Единая Россия” firqäse mitingında möfti Tälğat Tacetdin qılıç kütärep, AQŞqa qarşı cihad iğlan itüe tatarstanlılarnı şaq qatırdı. Qaban artı mädräsäse başlığı İsxaq Lotfullin Tälğat Tacetdinnıñ çamadan tış tile beldelüen işetkäç, üzeneñ quanğanın äytte. Çönki moña qadär Tälğat möftineñ nindi räweştä buluın, nilär qılanuın küpçelek belmi ide, xäzer Tacetdin üzen üze faş itte, dide İsxaq Lotfullin. Çınnan da, üzen verxovnıy möfti dip iğlan itkän Tacetdinnıñ radikal ekstremizm yulında buluı, ayıq aqıl belän eş itmäwe açıq kürenä.
