Britaniä tışqı eşlär ministrı Jack Straw, Amerikanıñ, Süriädä ximik qoral bar digän däğwalären şik astına quyıp Damask belän söyläşülär uzdırırğa täqdim itte. Kiçä Süriäneñ ximik qoralğa iä bulu ixtimalı turında Amerikan prezidentı George Bush beldergän ide. Läkin xäzer Säddäm rejimı inde yuq, häm Damaskka mönäsäbäten üzgärtergä kiräk, dide Straw. “Süriä öçen, Säddäm rejimınıñ betüen añlaw bik möhim, häm şulay uq, yaña çınbarlıqta säyäsätne üzgärtü dä zarur”, dide Straw. Bügen Bahrainda Britaniä wäkile İranğa Amerika Quşma Ştatları citäkçelegendäge koalitsiä belän xezmättäşlek itüe öçen räxmät belderde. Britaniä saqlanu ministrı Farsı Qultığı buylap säfären däwam itä.
Yevropa Berlegeneñ tışqı säyäsäte başlığı Javier Solana, Quşma Ştatlarnıñ Süriägä basım yasawı Yaqın Könçığışta kierenkelekne arttırırğa mömkin, dip belderde. Törkiä tışqı eşlär ministrı Abdullah Gül, Süriä-Ğiraqtan soñ Amerika Quşma Ştatlarnıñ ikençe xädäfenä äylänergä tieş tügel. dide. Süriä üze böten ğayepläwlärne kire qağa. Ğaräp Ligası başlığı Ämr Mussa da, ğayepläwlärne mäğnäsez dip atadı häm alarnıñ töbäktä tağın da östämä kierenkelek tudıruı öçen borçılu belderde. Xäzer, böten köçne Fälestin mäs’äläsen çişügä quyarğa kiräk, dide Ämr Mussa.
