Gruziäneñ Milli İminlek Ministrlığı bügen, 1999nçı yılda Mäskäw häm Volgodonskida yortlarnı şartlatunı oyıştıruçılarnıñ berse buluda şiklänelgän Açimez Goçiyaevnıñ Pankisi tarlawığında qaçıp yörüe ixtimal dip belderde. Ministrlıqnıñ matbuğat wäkile Nika Laliaşvili süzlärenä qarağanda Pankisi’da uzdırılğan maxsus çaralar waqıtında Goçiyaevnıñ ike yardämçese qulğa alınıp Rusiägä tapşırılğan bulğan. Pankisi tarlawığı-näq Gruziä belän Çeçnya çige buyında, Rusiä räsmiläre tarlawıqta çeçen suğışçılarınıñ qaçıp yatuın belderep kilä.
Gruziä prokuraturası Milli İminlek Ministrlığına, üz wäkälätlären –kirägennän artığraq qullanu turındağı ğayepläw nigezendä cinäyät eşe başladı. Prokuror Giorgi Jikia Azatlıq radiosına, şundıy uq ğayepläwlär Gruziäneñ terrorğa qarşı köräş üzägenä qarata da bar, dide.
Yıl başında Gruziä parlamentı deputatı , Berdämlek Firqase citäkçese Jumber Patiaşvili, elekke milli iminlek ministrı Vaxtang Kutateladze qaramağındağı xezmätkärlärneñ säyäsi partiälär häm oyışmalar turında yäşren mäğlümat cıyğannarı turında beldergän ide. Gruziä parlamentı ul çaqta Patiaşvilinıñ däğwaların tikşerü öçen komissiä tözede. Prokuror, mäxkämä eşe qısalarında-elekke milli iminlek ministrı Kutateladze ğına tikşerelmiäçäk, dip belderde. Kutateladze 2001nçe yılda wazifasınnan kitte. Moña , bäysez Rustavi-2 televideniä kanalına bärep kerüne täñqit itkän uram cıyınnarı dulqını säbäp buldı.
