Ütkän yal könnärendä, Qazan şähär başlığı citäkçelegendäge Tatarstan delegatsiäse Qırğızstan başqalası Bişkäkneñ 125 yıllığın bilgeläp ütüdä qatnaşıp qayttı. Qazan qunaqları anda Qırğızstan tatarları belän dä küreşep söyläşte. Moña qädär Qırğızstan tatarları yanına şul xätle Qazan tatarınıñ kilgäne bulmağan ikän. Hawa alanında «Tatarstan» dip yazılğan oçqıçnı kürep, Bişkäk tatarları ğorurlanıp häm quanıp, yılap cibärgän. Bu xaqta bezgä, İntertat.ru agentlığınıñ xäbärçese söyläde. Başqa töbäklärdä şikelle uq, Qırğızstandağı tatarlar häm başqortlar da saqlanıp qalu öçen küp köç quya. Ämma, Qırğızstannı başqa respublika häm illärdän ber närsä ayırıp tora. Andağı millättäşlärebezneñ telen, mädäniäten iñ berençe çiratta alar üzläre, häm Rusiä belän Qırğız däwläte dä qayğırta ikän.
III bötendönya kongressınnan soñğı aylarda Tatarstan xökümätenä Rusiäneñ Qırğızstandağı häm bu respublikanıñ Rusiädäge ilçeläre yazğan xatlar kilgän. Anda 2 ilçe Qırğızstandağı tatarlarnı borçıy torğan problemalarnı kütärep, alarnı Tatarstannan xäl itüne sorağan.
Qırğızstandağı tatar cämğiäte wäkilläre Bötendönya tatar kongressı belän dä tığız elemtädä tora. «Tuğan tel» isemle tatar- başqort cämğiäte citäkçese Gölsem Ulmaskulova Qazanğa yış kilep yöri. Tatarstan xakimiätläre dä cawapsız qalmıy. Tatar kongressınıñ yıraq häm yaqın çit illär belän eşläw bülege citäkçese süzlärençä, ütkän yılda Qırğızstan tatarlarnıñ gäzitenä kompyuter büläk itelde, yäkşämbe mäktäbe öçen matur ädäbiät kitapları häm däresleklär cibärelde. Äle düşämbe könne genä, tatar cämğiäte wäkile sotsial tä`eminat ministrlılığı yärdäme belän 2 invalid kolyaskasın aldı.Bişkäk tatarları Qazan şähär başlığı belän oçraşqanda başqa problemaları turında da süz alıp barğan. Alar mäsälän, tatar jurnalistikası fakul’tetında üzlärenä xäbärçe äzerlärgä telilär, cämğiätneñ yäkşämbe mäktäbenä tatar tele häm milli muzıka uqıtuçıları da kiräk. Tatar Kongressnıñ yuğarı uqu yortları belän kvotalar turındağı kileşüen istä totqanda, bu mäs’älälärneñ küpmeder däräcädä xäl itelüenä ömetlänep bula.
Qırğızstandağı 46 meñ tatarnıñ barısı da Tatarstan birgänen genä kötä disägez, yalğışasız. Qırğızstan tatarları arasında şaqtıy xälle häm uñışlı eşläwçe eşmäkärlär dä bar. Mäsälän Avtovaz şirkäteneñ «TänŞan-Avtovaz» digän Üzäk Aziä bülege belän bezneñ millättäşebez citäkli. Andıylar rätendä küptän tügel Qazanğa Tatarstan oçqıçın lizingka satıp alırğa, dip kilgän Älfiä xanım Ğäliäskärovanı da kiterep bulır ide. Ul ütkärgän söyläşülär uñışlı tämamlansa, Bişkäk tatarları üz hawa alanında Tatarstan oçqıçın küräçäk äle.Bikä Timerova, Qazan.
