Gaza sızığında ber fälestinle atıp üterelde

Uzğan töndä, Amerikan Däwlät Sekretare Colin Powellnıñ , İsrael häm Fälestin citäkçeläre belän söyläşülären tämamlap töbäktän kitkänenä berniçä säğat uzğaç qına, İsrael ğaskärläre ber fälestin suğışçısın atıp ütergän. Fälestin çığanaqları –bu keşe Gaza Sızığınıñ könyağında bulğan bäreleşlärdä üterelgän dip xäbär itte. İsrael yağınnan moña qadär ber nindi añlatma da kilmäde.

Kiçä Jerusalimda Powell İsrael premyer-ministrı Ariel Şaron belän oçraşqanda, İsraelne, fälestin suğışçıları höcümnärne tuqtatırğa riza bulmasalar da, İsrael ğaskärlären tönyaq Gazadan häm Bäitlehäm'dän çığarırğa, ul cirlärne Fälestin iminlek xezmäte kontrolenä tapşırırğa çaqırdı. Bu ğamäl-möhim häm zur köçkä iä berençe adım bulaçaq, dide Powell.

Fälestin premyer-ministrı Mähmüd Abbasnı isä Powell-Hämäs oyışmasın çiklärgä çaqırdı. Oçraşu waqıtında, Powell, tınıçlıq urnaştıru eşendä Hämäs belän xezmättäşlek bula almıy, dip belderde: "Böten xalıqara cämäğätçelek Hämäsne kisken täñqitläw yulına basırğa tieş. Kiläçäktä bu oyışmanıñ eşçänlege turında farazlap qına bula; xäzerge oyışma isä-minem fikeremçä, tınıçlıq urnaştıruda partner bula almağanın kürsätte inde" dide Powell.

Uzğan atnada İsrael höcüme waqıtında yaralanğan yuğarı Hämäs wäkile Abdel-Aziz al-Rantissi, Powellnı "sionist häm yalğançı" dip atadı.