Accessibility links

Кайнар хәбәр

Tatarstanda ölkännär könen bilgeläp ütü başlandı...


Oktäberneñ 1sendä xalıqara ölkännär köne bilgeläp ütelä. Tatarstanda bäyräm çaraları 29nçe sintäberdä uq başlanıp kitte häm oktäberneñ 7-senä qädär däwam itäçäk. Sişämbe könne «Qazan» milli-mädäni üzägendä veteran oyışmalarınıñ plenumı bulıp uzdı.

Oktäberneñ 1ndä qartlarğa buşlay munçada yuınırğa häm çäç aldırırğa mömkin. Qayber marşrut avtobusları da 1nçe oktäberdä ölkän yäştägelärne tüläwsez yörtergä wäğdä itte.

Tatarstan prezidentı yalda bulu säbäple, xalıqara ölkännär köne belän Tatarstan xökümäte citäkçese qotladı. Anda bolay äytelä: «Sez, xörmätle veterannar, 45nçe yılğı Watan suğışında ciñügä ireştegez, xucalıqnı torğızdıq, cämğiätneñ äxlaqi traditsiälären saqlap qaldığız. Bez sezgä räxmät äytäbez häm ilebezne yaratırğa, teläsä nindi şartlarda ışanıç häm optimizm saqlarğa sezdän öyränäbez».

Oktäberneñ 1sendä Qazan şähär başlığı da ölkännär belän oçraşırğa uylap tora. Şuşı tantanalı çara Qazannıñ iñ zur binasında - «Basketbollxol» sarayında bulaçaq.

Däwlät avtoinspeksiäse başlığı da bäyräm aldınnan maşina yörtüçelärgä möräcäğät itep, cäyäwlelärgä iğtibarlıraq bulırğa çaqırdı. Çönki yulda cäräxät aluçı häm ülüçelärneñ kübese ölkän yäştä bula ikän. Bıyılnıñ 8 ayında respublika yullarında cäyäwlelär gäyebe belän 753 yul faciğäse terkälgän. Alarda 85 keşe ülgän 691re imgängän, dielä Däwlät avtoinspeksiäseneñ xäbärendä.

Tatarstanda yäşäw minimumı 2 meñgä yaqınlaşa. Bu yılnıñ avgustında pensiä 8% artqannan soñ, yäşe citü belän pensiägä çığuçılarnıñ pensiäse 1 900 sumğa citte citüen, ämma bu san da yäşäw minimumınnan kimräk bulıp qala.

Bikä Timerova.
XS
SM
MD
LG