1 üktäbr könne Könçığış Qazaxstannıñ Semipalat, yağni Semey şähärendä "Közge İrtış moñnarı" dip isemlängän 4nçe xalıqra tatar sänğate festivale açıldı, xörmätle tıñlawçılar. Bäyräm şulay uq şähärneñ 285 yıllığına da turı kiterelde. Bu çaranı oyıştıruçılar-Qazaxstan xalıqları assambleyası, Bötendönya Tatar Kongressı Başqarma Komitetı, Qazaxstan häm Tatarstannıñ mädäniät ministrlıqları, Qazaxstandağı tatar-başqort oyışmaları berläşmäse, Tatarstannıñ Qazaxstandağı daimi wäkillege , Semipalat häm Üst-Kamen şähärlärendäge tatar ictimaği üzäkläre. Festivalneñ maqsatı – tatar xalqınıñ milli mädäniäten tanıtu, üsterü, Qazaxstanda yäşäwçe xalıqlarnıñ mädäniäten bayıtu. İcat bäygesenä Tatarstannan barğan sänğatkärlär häm jurnalistlar yul östendä Omskida berniçä säğatkä tuqtalış yasağanda bezneñ xäbärçebez alar belän oçraşqan. "Közge İrtış moñnarı" festivale Semipalat şähärendä 4 kön däwam itäçäk. Festivaldä Azatlıq xäbärçeläre dä qatnaşa, iñ soñğı xäbärlärne bezneñ tapşırularıbızda işetersez.
Sania Mirxalieva, Omski-Semipalat
Sania Mirxalieva, Omski-Semipalat
