Madrid konferensiäsendä Ğiraqnı tözekländerügä $37,5 mlrd wäğdä itelde

İspan başqalasında ütkän, Ğiraqqa finans yärdäm kürsätü mäsäläsenä bağışlanğan konferensiädä, donor-illär häm xalıqara oyışmalar Ğiraqnı tözekländerügä barlığı 37,5 milliard dolar aqça birergä wäğdä itte. Dönya Bankı Ğiraqqa aldağı 4 yılda 56 millard kiräk bulaçaq digän ide.

Konferensiädä çığış yasağan Quşma Ştatlar däwlät sekertare Colin Powell, bu -- Ğiraqlılarğa zur yärdäm bulaçaq dide:

Audio (Colin Powell)

"Uñışqa ireşü öçen waqıt, tırışlıq häm barıbızdan da yumartlıq kiräk bulaçaq. Ğiraq xalqı bu xälitkeç mizgeldä kürsätelgän yärdämne onıtmayaçaq."

Ğiraqtağı amerikan administratsiäse başlığı Paul Bremer, konferensiädä qatnaşqan illär Ğiraqqa bergäläp yärdäm itergä kileşte dide:

Audio (Paul Bremer)

"Bu illärneñ elegräk üz-ara qarşılıqları bulğandır. Qayber mäsälädä äle dä bardır. Ämmä monda kilüläre belän alar töp mäsälädä kileşte: Ğiraq xalqına yärdäm itü kiräklege mäsäläsendä."

"Yaña Ğiraq qotlı bulsın" digän soñğı süzlären Bremer ğäräp telendä äytte.

İñ zur külämdä yärdämne Quşma Ştatlar wäğdä itte: 20 milliard dollar. Yaponiä, Xalıqara Valuta Fondı häm Dönya Bankı - 3 belän 5 millard arasında. Söğüd Ğäräpstanı häm Küwäit - 1 milliard. İran - 300 million dollardan tış, neft ölkäsendä yärdäm wäğdä itte.

Dönya Bankı belgeçläre fikerençä, aldağı 4 yılda Ğiraqqa 56 milliard dollar kiräk bulaçaq.