6nçı uktäbr' Tatarstan respublikası konstitutsiäse köne Qazan uramnarı tınıp qaldı. Yal könnäre ozın bit äle. Xättä awıl-xucalığı produktsiäse yärminkälärenä dä xalıqnıñ älläni ise kitmi xäzer. Pensionerlar ğına beraz qaynaşıp ala. Aqçalı keşegä härwaqıt satıp alırğa bar da bar xäzer allağa şöker. Tatarstan Konstitutsiäseneñ 11 yıllığına mönäsäbäten belderergä teläwçelär Qazannıñ İrek mäydanına çıqtılar. “Единая Россия” firqäse wäkilläre mitingların “Konstitutsiä tınıçlıq garantı” digän şiğär belän ütkärdelär. Tatarstan Däwlät Şurası Räise häm ber ük waqıtta “Единая Россия” firqäseneñ regional' bülege citäkçese Färit Möxämmätşinnıñ qotlawında da konstitutsiä kitergän qazanışlarnı täqrarlağan öleşendä-“Tatarstan Respublikasınıñ totrıqlı üseşeneñ ışanıçlı zalogı bulğan millätara häm dini tatulıq häm grajdannar arasındağı tınıçlıq qimmätlärenä bez tağın ber qat tieşle bäyä biräbez” dielä. Konstitutsiä könendä İrek mäydanına piketqa çıqqan Bötentatar ictimaği üzäge wäkilläre dä 11 yıl elek qabul itelgän konstitutsiäneñ qazanışların inqar itmilär. Äye “möstäqil däwlät” , “xalıqara xoquq” töşençäläre kertelgän konstitutsiäne referendumğa çığarıp eyforiä xälendä yörgändä dä Tatarstan xalqı tınıçlığın saqlap qala aldı. Millätara tatulıq 1552nçe yıldan birle bozılmıy disäñ dä bula. Federal' üzäk basımı astında konstitutsiäne sütep eçke yağın tışqa qaytarıp tekkändä dä älläni kütärelep bärelüçe bulmadı. Bügenge piketqa da ictimaği üzäk “Çın federalizm ul –möstäqil respublikalar berlege” digän şiğär belän çıqtı. Pikettan soñ Bötentatar ictimaği üzäge liderlarınıñ berse Yunıs Kamaletdinov İrek mäydanına kem nindi säbäplärdä häm maqsatlarda çıqtı digän temağa äñgämädä bolay dide.
Anıñ fikerençä däwlät, xökümät citäkçelege, türälär tözegän bu firqäğä ışanıç yuq. Çönki türälärgä dä xalıq ışanıçın yuğalttı. Ğadi xalıq üzençä yäşi, türälär üzençä. Alarnıñ tormış däräcäseneñ ayırması bik zur. Türälär xalıqnıñ xälenä kermilär. Xalıqqa tağı da baylıq cıyu çığanağı bularaq qına qarıylar.
Yunıs Ätnäle.
