Bu teatrğa 1933nçe yılda artist, rejisser häm dramaturg Kärim Tinçurin nigez sala. Awıl xalqına xezmät kürsätü yözennän, Tatar akademiä teatrınıñ kolxoz-sovxoz filialı bularaq oyıştırıla. 1944nçe yılda bu teatr “Tatarstan respublikası küçmä teatrı”,- dip üzgärtelä.1989nçı yıldan statsionar teatr xäzerge isemdä.
Törle yıllarda teatrnıñ sänğät citäkçese, Ğabdulla Yosıpov, Käşifä Tumaşeva, häm anıñ ulı Rawil Tumaşev bula.Teatrnı yubileye belän Tatarstannıñ Premyer Ministrı urınbasarı Zilä Wälieva qotladı häm şuşı bäyrämgä üzeneñ zur xörmäten beldergän Tatarstan Prezidentı Mintimer Şäymievnıñ “Räxmät xatı”n uqıdı.
Soñğı un yıl eçendä teatrnı Tatarstannıñ törle rayonnarınnan alıp Ufa belän Çiläbe kebek şähärlärdä, Mäskäw belän S-Peterburglarda yörtep, İstanbul şähäreneñ mädäniät saraylarında tamaşaçını tañ qaldırğan artistları belän teatrnıñ talantlı baş rejisserı Räşit Zahidullin eşli.Bu teatrda uynağan artistlar arasında artist Nail Şäyxutdinov, Xäcär Şakurova, teatrnı alardan başqa küz aldına da kiterep bulmağan İslamiä Mäxmütova belän Xälil Mäxmütov, küp kenä yumoristik obrazlar tudırğan Zöfär Xarisovlar bu teatrnıñ yöze.
Teatr veterannarı Rawil Tumaşev, 85 yäşlek Vera Minkina, Lyutsiä Farsina häm bik küp teatrğa ğömeren bağışlağan mädäniät xezmätkärlären teatr kollektivı çäçäklär belän qotladı.Kiçäneñ ikençe bülegendä teatr kollektivı xalqıbıznıñ milli tormışın çağıldırğan, teatrnıñ repertuarında bulğan iñ yaxşı spektakl`lärdän özeklär kürsättelär.
Bäyräm könnärendä Qazan mädäniäte şaqtıy canlı.7nçe noyäber könne Zur konsert zalında Mäskäwneñ “Gelikon-opera” teatrı artistları cırladılar.
8nçe noyäber könne bu zalda S-Peterburgtan kilgän muzıkantlar çığış yasayaçaq. 7nçe noyäber könne kürenekle rejisser, akademik Marsel' Sälimcanovnıñ tuğan köne. Bıyıl aña 69 yäş tulır ide. Rejisser bulıp eşläw däwerendä Marsel' Sälimcanov 100dän artıq spektakl' quyğan. Kamallılar anıñ xörmätenä bağışlap Tufan Miñnullinnıñ yaña p'yesası buyınça ”Şulay buldı şul” isemle spektakl' premyerası äzerlädelär häm anı anıñ tuğan könendä säxnägä quydılar.Azatlıq radiosı öçen Qazannan Mälikä Basıyr.
