Yaña yıl aldınna, ğädät buyınça, ütep kitkän yılğa yomğaq yasala, yañasına plannar qorıla. 2003— yıl Udmurtiä tatarları tarixında alay zur waqiğalar belän bulmasa da, küp kenä çaralar belän istä qalır. Cämäğätçelek küñelendä Tatarstan Respublikası Prezidentı Mintimer Şäymiev belän oçraşu ozaq saqlanır. Milli bäyrämebez sabantuy respublikanıñ tatarlar kümäk yäşägän barlıq töbäklärendä görläp uzdı. Ütep kitkän yıl yubileylarğa bay buldı — Udmurtiä tatar ictimaği üzägeneñ berençe prezidentı Mäsgut Garatuevqa 75 yäş tuldı, İjaw şähäreneñ Aqsaqallar cämğiäte räise Şihabetdin Sadıykov, Votkinsqta yäşäwçe tanılğan şağir Riza Şäfi, elekkege 20—tatar mäktäbe direktorı Ädip Kärimov —80 yäşen bilgeläp üttelär, Votkinsk tatar uzäge räise häm «Duslıq» cämğiäte citäkçese Mäğsum Gazimcanovqa —70, bik matur şiğerlär avtorı Gimran Safinğa — 60 tuldı.
İjawda yaña mäçet tözeleşenä nigez salındı, ber koloniädä totqınnarğa ğibädät qılu urını açıldı.
Mojgada milli—mädäni avtonomiä tırışlığı näticäsendä räsmi räweştä berençe tatar sıynıfı tuplandı. Glazov, Votkinsk, Sarapul, Kambarka, Mojğa, häm, älbättä, İjawda milli kiçälär, oçraşular, bäyrämnärebez daimi oyıştırılıp kilde. Tatar ansabl'llär härberse milli moñnarıbıznı taratuda üz yunäleşendä ayırım uñışlarğa ireşkän, «Güzäl» ansambleneñ biyu kollektivı Mäskäwdä çığış yasap, Bolğariägä çaqıru alğan, «Serdäş»neñ cırçıları tormış qorıp, bäbilär üsterä, «Şatlıq» bik küp gastrol'lärdä bulğan, «Läysän» ansamble citäkçese İl'fat Äglamcanovnıñ cırları Qazanda yäş cırçılar tuplanmasında dönya kürgän. Sanap kitsäñ, küpkä cıyıla. Mägärif ölkäsendä dä istä qalırlıq waqiğalar bulğan. Tulıraq mäğlumat belän mägärif ministıyrlıygınnan belgeçe Älfiä Rawil qızı Ğaysina .—audio—
Mägärif ölkäsenä qağılğan uñışlar turında ğına tügel, yuğaltularnı da äytep kitärgä kiräk. Qızğanıçqa qarşı, bıyılğı uqu yılında ike iñ käçle tatar tele uqıtuçıların arabızdan mäñgegä yuğalttıq. Bu Zölfiä Kasıymova Balezino rayonınnan häm gimnaziädän Räzilä Lekomseva. Şuşı kännärdä genä tatar cämäğätçelege tağın ber zur yuğaltu kiçerde. 76—nçı yäşendä qatı awırudan soñ üzeneñ ğomeren yäş buınnı tärbiäläwgä bağışlağan qärdäşebez Rawil Minnäxmät ulı Gubaev arabızdan kitte. Sälätle pedagog, siräk şäxeslärneñ berse, İjaw şähäreneñ 10 mäktäbendä çirek ğasırğa yaqın citäkçelek itkän, bik küp uquçılar tärbiälägän keşelärneñ berse.2003—nçe yılda milli jurnalistikada üzgäreşlär sizelerlek. Süzne «Yañarış» gazetasınıñ baş redaktorı İrek Şäripovqa birik äle.
—audio— Şulay itep Udmurtiä tatarları tormışında şaqtıy ğına küñelgä uyılıp qalırlıq waqiğalar buldı. Alarnıñ iñ möhimnäre turında mägärif ministırlıgınnan belgeç Älfiä Ğaysina häm «Yañarış» gazetası citäkçese İrek Şäripov söylädelär.
Yaña yılda yañadan tarixqa yazılıp qalırlıq waqiğalar da küp kötelä. Alarğa tuqtalıp, İrek Şäripov bolay dide.—audio—
Yaña yılda tarix bitlärenä yazılıp qalırlıq waqiğalar, oçraşular, çaralar qup oyıştırılsın, millätebez alğa taba da useş yulında bulsın digän teläklär belän İjawdan Xämidä Ğayfullina.
