Böten İran provinsiäläre gubernatorları kiläse ayğa bilgelängän parlament saylawların kiçekterüne sorap xökümätkä möräcäğät itte. Mäğlüm bulğança ilneñ konservativ Saqçılar Şurası meñlägän kandidatnı saylawlarda qatnaşudan tıydı. Eçke Eşlär ministrlığınıñ matbuğat wäkile xäbär itüençä, 27 gubernator kiçä kiç Tähranda oçraşıp ber tawıştan bu möräcäğätne qabul itkän.
Provinsiä başlıqların prezident Möhammäd Khatami bilgelägän. Başta parlament saylawlarında qatnaşuı tıyılğan namzätlärdän - 860 keşegä röxsät birelgän inde, dip xäbär itelä.
66 il wäkilläre cıyılğan Qoralsızlanu Konferensiäsendä İran tışqı eşlär ministrı Kamal Kharrazi, başqa illärne İran belän atom texnologiälären büleşergä çaqırdı. Tınıç maqsatlarda qullanılaçaq atom texnologiälärenä İrannıñ da xoquqı bar, çönki "bez atom qoralın cäyeldermäw turındağı kileşüne bozmadıq" dide Kharrazi. Xalıqara basım astında qalğan räsmi Tähran küptän tügel Xalıqara atom Agentlığı belän – kötelmägän tikşerülärgä röxsät birüe turında kileşü tözede. İran, üzendä citeşterelgän atom programmalarınıñ barı tik tınıç maqsatlarda, energiä çığanağı bularaq qullanıluı turında belderep kilde.
