Qorban bäyräme aldınnan räsmi tanılmağan möfti Fatıyx xäzrät Aliullovnı Ölkä Yustitsiä idäräsenä çaqırğannar. Fatıyx xäzrät Mäskäw häm Tatarstan möftiätläre belän elemtädä tora, alar belän xezmättäşlek itä. Läkin anı Tälğät Tacetdin yurisdiksiäsenä qarağan mäçet mäxälläläre dä çaqıra ikän. Şuña rizasızlıq belderep şiqäyätlär yazğannar. Yustitsiä idäräsendä mondıy ğämälgä çik quyunı taläp itkännär. Läkin Fatıyx Aliullov menä ni dip cawap birgän: “Min törmälärdä, xärbi çast''lärdä dä bulğalıym, alar da bezneñ Din idäräsendä terkälmägännär. Min qayda möselman qärdäşlärebez wäğäzlärgä moxtac, şunda yörim. Ä mäçetlärgä yörü, anda wäğäzlär totu – minem töp wazifam.”
Şundıy uq söyläşü ölkä üzägeneñ İdel aryağı rayonı xakimiäte binasında da bulğan. Fatıyx xäzrät mondıy ğämällärneñ Qorban bäyräme aldında buluın bäyrämneñ yämen kimetü, nindider ızğış çığaru tırışlığı dip bäyäläde. Şulay da şöker, Qorban bäyräme Ul''yan ölkäsendä bik kürkäm uzdı. Şähärlärdä dä, awıllarda da. İmamnar, mäxällälär räisläre äytüençä, bıyıl qorban çaluçılar sanı da küpkä artqan. Şähärneñ Timeryul rayonı mäxälläse mäçetendä yañalıq – ğadi pensioner Mäğsüm Şihapov üz aqçasına küp itep imän taqtaları kitergän. Maqsatı – märxümnärne cirläw qıyınlıqların kimetü. Keşe wafat bulsa, anıñ yaqınnarına bik küp wazifalar yöklänelä. Şähär cirendä qäbergä imän taqtalar tabu bik qıyın. Aldan äzerläp quyar ideñ – saqlaw urını yuq. Mäğsüm Şihapov şundıy oçraqlarğa sädäqa äzerlägän. Häm mondıy ğämäl daimi baraçaq, di.
Ayrat, İbrahim, Sember
Ayrat, İbrahim, Sember
