Udmurtiä xalqı 14nçe martta Rossiä Prezidentı belän berrättän respublika başlığın da sayladı. Düşämbe irtän respublikanıñ Üzäk saylaw komissiäse birgän sannarğa qarağanda, saylaw isemlegendä terkälüçelärneñ 67 protsenttan artığı tawış birergä uçastoklarğa kilgän.
Udmurtiä saylawçılarınıñ 75,9 protsentı Russiä Prezidentı Vladimir Putin öçen üz tawışın birgän. Rossiä Üzäk saylaw komissiäse birgän isemlektäge urınnarğa Udmurtiä saylawçıları üzgäreşlär kertmägän. Tik sannarda beraz ğına ayırmalıq bar. Kommunistlar partiäse wäkile Xaritonov 9 protsenttan artıq, Glaz'yev 4, Xakamada 3,8 protsent tawış cıyğan.
Xäzer Udmurtiä Prezidentı urınına kandidatlarnıñ niçek tawış cıyularına küz salıyq.
Saylawçılar 8 kandidat arasınnan älegä qädär prezident wazifasın başqarğan Aleksandr Volkovqa östenlek birgän — bu san 54,21 protsent täşkil itä. Sannar tağın şunı da kürsätä — Volkov awıl xalqı arasında kübräk tawış cıyğan — 70 protsent, ä respublika başqalası İjawda älege sannıñ yartısı ğına — 35 protsent. Tağın ber qızıq san — Yukamen rayonı saylawçılarnıñ 92 protsentı bu kandidatnı xuplıy. Respublika rayonnarı arasında älege rayonda yäşäwçelärneñ küpçelegen udmurt milläte wäkilläre täşkil itä. Şul uq waqıtta udmurt millätennän bulğan berniçä kandidat bu töbäktä barlığı 0,2 protsent qına tawış cıya alğan. Şunı da äytergä kiräk, udmurt millätennän bulğan kandidatlar öçen respublika xalqı bötenläy az tawış birgän — Afanas'yev 2,4; Ştıykov — 1,4 protsent tawış cıyğan. Döres, alar ikese dä respublikada tuıp üssälär dä, udmurtlar äytüençä, tuğan telendä irken aralaşsalar da, berse — Mäskäwdä, ikençese — Soçida yäşilär. Kandidatlar arasında tağın berniçä, çittän kilep adaşqan keşe bar —dagestanlı Dalgatov, aña saylawçılarnıñ 0,3 protsentı tawış birgän, Qazannan eşsez yurist Kletenkov ta 0,6 protsent tawış cıyğan.
Kandidatlar arasında Volkovqa qarşı torırlıq köndäş — ul tabip Yevgeniy Odiankov digän fiker bulsa da, anıñ saylaw ştabı eşne bik aktiv alıp barsa da, xättä babası udmurt buluı da, xalıqnı torğınlıqtan qotqaruçı batır itep kürsätergä omtılıp çığarğan äkiäte dä, massa küläm mäğlumat çaralarında, gazetalarda anı kükkä çöep maqtağan mäqälälär basılsa da, östenlek alırğa mömkinlek birmägän — saylawçınıñ 18 protsentı ğına Odiänkovnı yaqlağan. Äytergä kiräk, bıyıl respublikada saylaw kampaniäse, berençe prezidentnı saylaw çorı belän çağıştırğanda, küpkä tınıç uzdı. Kandidatlarnıñ ber—bersenä şaşınıp qara yağu oçraqları bik az terkälde, dide saylaw komissiäse räise Vladimir Ponomarev.
Şulay itep xalıq tarafınnan bügen respublikada säyäsätçe bularaq ta, citäkçe bularaq ta Aleksandr Volkov tanıldı.
Düşämbe irtän jurnalistlar belän oçraşuda Volkov «… bu ayda bik küp rayonnarda xalıq belän oçraşular waqıtında bik küp problemalar turında citkerdelär, ä xäzer alarnı xäl itü maqsatınnan här ministerstvo, vedomstvo citäkçeläre belän küreşep, alar aldında bu sorawlarnı quyaçaqmın», dip belderde.
Udmurtiä Konstitutsiäse buyınça Prezident Respublika Xakimiätenä citäkçene täqdim itärgä xoquqı bar. Tik anı häm başqa ministrlarnı Däwlät Sovetı da raslarğa tieş. Soñğı atnalarda Russiä Xökümätendäge üzgäreşlär Udmurtiä respublikasın da çitlätep uzmayaçaq, yaña bilgelänülär, ministrlıqlar, vedomstvolarda üzgäreşlär bulaçaq, şulay uq qısqartular da kötelä digän süzlär işetergä turı kilde. Bolar xaqında kiläse xäbärlärdä.
Xämidä Ğäyfullina, «Azatlıq» radiosı, Udmurtiä.
