Accessibility links

Sember qalasında Däwlät Dumasına saylawnıñ ike märtäbä uñışsız uzuı “New York Times” gäziteneñ dä iğtibarın cälep itkän


Ä “Washington Post” Dimitrowgrad şähärenä inde öçençe ildän atom qaldıqlarınıñ qaytarıluı öçen urıslarnı maqtağan yazma çığarğan. Tik menä AQŞ birgän aqçanıñ qaya kitkäne genä mäğlüm tügel.

Sember ölkäseneñ tönyak rayonnarındağı urıs awılları xalqınıñ yartısınnan küben çuaş-tatar täşkil itä. Alarnıñ mäktäpläre urıslaştıru säyäsäteneñ töp qoralı bulıp tora. Barı tik berniçä awılda ğına “etnokul'tura tügäräge” digän tärbiä ısulına urın birelä. Şundıylarnıñ berse – räsmi räweştä ölkä üzägeneñ ber öleşe dip sanalğan Laişevqa awılı. Biredä, fidaqär zat Färidä Xämidullina tırışlığı arqasında, tatar balaları ana tele, milli mädäniät belän berqädär xäbärdär.

Färidä xanım mäktäp qısaları belän genä çiklänmi: säyäxätlär oyıştıra, balalarnı ölkä üzägendäge çaralarğa alıp kilä, üze dä törle mädäni çaralar oyıştıra. Uzğan atnada, mäsälän, Laişevqa mäktäbendä cirle şağirlär, milli xäräkät aktivistları belän oçraşu kiçäse uzdı. Anda qunaqlar da, balalar da, äti-änilär dä üz ostalıqların kürsättelär.

Bäyräm yaxşı uzdı. Läkin küñelsez xislär dä tuarlıq. Färidä Xämidullina yıl sayın diärlek mondıy çaralar oyıştıra – yıl sayın anda qatnaşuçı äti-änilärneñ sanı kimi bara. Färidä xanım monıñ säbäben matdi yaqnıñ ruxi yaqtan östenlek aluı belän añlata – “bazar mönäsäbätläre tä'sire”, di. İkençe möhim säbäp tä bar: urıs mäktäbendä belem alğan yäş äti-änilär üzläre dä milli üzañnan mäxrüm üskännär – kitap, matbuğat belän qızıqsınmıylar. Yäşäyeşneñ töp maqsatı – aqça tuplawğa äylängän. Şulay da milli üzañın saqlağan ğailälär bar äle. Mäsälän, Sadriewlar ğailäse başqalarğa ürnäk bulıp tora. Ğomumän, andıy äydäwçelär, andıy ğailälär barında millätebezneñ yäşäyeşenä ömet yuq tügel äle.

“Azatlıq” radiosı, Ayrat İbrahim, Sember.

XS
SM
MD
LG