Accessibility links

Кайнар хәбәр

Tönyaq Osetiädäge xällärgä Başqortstan cämägätçelege mönäsäbäte


Tönyq Osetiäneñ Beslan şähärendäge mäktäptä totıqlar alu belän bäyle kierenke wäzğiät başqortstanlılarnı da bitaraf qaldırmadı. Xäzer küpçelek keşe telewidenie häm radiotapşırularnıñ här säğat başındağı yañalıqlar çığarılışın qarap barırğa tırışa. Cämägät urınnarında da söyläşülärneñ töp temına äylände Osetiädäge waqıyğalar. Totıqlar alu belän bäyle xäl Başqortstanda xoquq saqlaw oyışmalarınıñ eşen dä yaña rejimğa köyläde. Başqortstan militsiäse xezmätkärläreneñ baytaq öleşe xäzer 12 säğätlek eş rejimına küçerelgän. Ayıruça Ufanıñ xalıqara hawa alanı, timer yul vokzalı, autobuslar vokzalları häm başqa möhim obyektlar nıqlı saq astına alındı. Misal öçen, başqalanıñ timer yul woqzalında xäzer poyızdlarğa çığu häm kerü urınnarı yanında militsiä xezmätkärläre täwlek äylänäse saq tora, passajirlarnı tikşerep kertä. Bigräk tä Kavkaz respubliklarınnan kilgän keşelärgä oxşağan här keşeneñ dokumentların tikşerü mäcbürigä äylände. Yul xäräkäte iminlege xezmätkärlärenä dä eş arttı. Alar xäzer Ufanıñ küp uram çatlarında saqta tora häm maşina yörtüçelärneñ dokumentların ğına tügel, ä küp maşinalarnıñ bağaj urınnarın, salonnarın da centekle tikşerä. Başqortstannıñ tanılğan şäxesläre Tönyäk Osetiädäge waqıyğalar uñayınnan üzläreneñ fikerläre belän kiñ mäğlümat çaralarında urtaqlaşa başladı. Misal öçen, Suğış häm xezmät, Xärbi köçlär häm xoquq saqlaw oyışmaları weterännarınıñ respublik sowetı räise Marat Mullağallämov 3 sentäbrdä matbuğatqa birgän äñgämäsendä Beslan şähärendä mäktäp balaların häm alarnıñ ata – anaların totıq itep alğan törkemne kisken ğäipli häm cinayätçelär üz cäzasın alırğa tieş, dip äytä. «Terrorçılarğa qarşı qatğıy häm qatı çaralar kürä başlarğa waqıt», – dip belderä veterän.

Başqortstannıñ möselman ruxanıyları da Tönyäk Osetiädäge xällärgä üz mönäsäbäten belderä. Mondıy ğämälneñ islam dinenä bernindi qağılışı bulmawın iskärtä ruxanıy citäkçelär. Totıqlar itep mäktäp balaların alğan törkemdäge keşelärne möfti Nurmöxämmät Niğmätullin citäklägän Başqortstan möselmannarı diniä näzaräte dä, möfti Tälgät Tacetdin citäklägän Üzäk diniä näzaratı da kisken xökem itte. Üzäk diniä näzaratı prezidiumı Beslan şähärendä totıqlar alu ğämälen kisken xökem itkän Belderü dä qabul itte. Comğa namazı aldınnan Ufadağı Lälä – Tyülpän mäçetendä Tälgät Tacetdin jurnalistlar belän oçraşuda tübändägelärne citkerde. (yazma) Äye, Başqortstanda Beslan şähärendä yözlärçä keşene, şul isäptän, mäktäp balaların totıq itep alğan keşelärne bügenge köndä nindi genä atamalar belän qähärlämilär. Alarnı yawız da, yırtqıç canwarlar da, tağın ällä kemnär dip tä atıylar. Şul uq waqıtta mäsäläneñ asılına töşenergä tırışuçılar ğına azraq kebek. Rusiädä ber – ber artlı qabatlanıp torğan terror ğämälläreneñ säbäplären açıqlaw häm alarnı beterergä tırışu omtılışları älegä kürenmi.
XS
SM
MD
LG