Accessibility links

Кайнар хәбәр

Köz citü belän Mäskäw tatarlarına qaytarılğan milli mädäni üzäktä eşlär dä canlana başladı


Bu yortqa ikençe yıl inde tatarlar xuca. Tik şulay bulsa da yortnı qaytarıluğa bağışlanğan zur çara bu binada älegä ütkärelgäne yuq. Uzğan yıl bu yortnıñ tözelüenä 90 yıl buluı iğlan itelsä dä anısı da niçekter sizelmi ütep kitte. Bälki bu binağa remont kiräklege zur çaralar ütkärüdän totqarlap ta toradır. Läkin anda remont eşläre başlanğan disäñ dä bula. Çönki binanıñ berençe qatında restoran tözeleşenä totınğan ber millättäşebez eşne qızu totarğa uylağan. Restorannı Ramazan bäyrämenä açalar ikän digän xäbärlär dä bar. Bu bina tarixı xaqında küp söylände inde, şuña kürä tarixqa qaramıy bügenge köndä nindi eşlär baruı xaqında bügenge xäbärlär.

Mäskäwneñ tatar mädäni üzägendä yaña sezon açılu uñayınnan zur çara ütkärelmäsä dä äkrenläp kenä törle tügäräklär üzeneñ eşen başlap ta cibärgän. Mäsälän tatar tele, räsem, cır, biyu, folklor törkem tügäräkläre uzğan yıldan uq eşli başlağan ide mädäni üzäktä. Bu yort tarixına bağışlanğan muzey açu da küzdä totıla. Baytaq qına äsbaplar da cıyılğan inde. İñ zur çaralarnıñ berse milli üzäktä kitapxanä açılu bulır mogäyen. Kitapxanägä kitaplarnı mäskäwlelär üzläre dä küpläp kiterä ikän, Qazannan Böten dönya tatar kongressı başqarma komitetı da zur ğına külämdä kitaplar buläk itkän yaña kitapxanägä. Mäskäw ğalime Röstäm Usmanov üzeneñ kitapxanäsen milli üzäk kitapxanäsenä büläk itep tapşırğan didelär. Ä inde 10 oktäbergä Mäskäw ölkäse milli mädäni möxtäriäte bu binada tatar tele olimpiadasın ütkärüne planlaştırgan. Tıñlawçılarğa täqdim itelgän, milli üzäkneñ massaküläm eşlär oyıştıruçısı Zämzämiä Säxäbetdinova belän bulğan äñgämädä milli üzäkneñ yaqındağı plannarı turında söylände.

XS
SM
MD
LG