Ukraina oppozitsiäse citäkçese häm prezidentlıqqa namzät Viktor Yuşçenko bügen Kievqa qaytıp üzeneñ isän-saw buluın ämma tulısınça sälamätlänü öçen berniçä kön kiräklegen belderde.
Yuşçenko Austriädä säyer awırudan däwalandı. Elgeräk ul bu awırunı 31-nçe üktäberdä ütäçäk prezident saylawlarındağı säyäsi köndäşläreneñ üzen maxsus räweştä ağulawı belän añlatqan ide. Çınlıqta Yuşçenkoğa ni buluı äle tögäl mäğlüm tügel, ämma Ukraina räsmiläre xakimiälärneñ moña qatnaşı buluın kire qağa.
Austriädäge tabiblar bernindi täğäyen mäğlümät birmi. Ämma uzğan atna axırında Austriä politsiäse Yuşçenkonıñ xastaxanä dokumentların qulğa aldı. Dokumentlarnıñ ni öçen qulğa alınuı äytelmäde.
Yuşçenko Ukraina televidenisenä interviewda üzen yaxşıraq xis itüe turında belderde. Ul üzeneñ nindi awırudan däwalanuı turında berni dä äytmäde, şul uq waqıtta üzen ağulawları turındağı elekke ğäyepläwlärne dä qabatlamadı.
