Rusiäneñ ölkä häm respublika citäkçelären Mäskäw täqdime buyınça cirle parlamentlarda saylatu qararı çıqqannan birle, Tatarstandağı säyäsätçelär häm citäkçeläreneñ kübese moñsu tınlıqqa çumdı. Berençe urınğa iqtisat, xucalıq, byudjet häm ağımdağı idärä eşläre çıqtı. Belgeçlär fikerençä, respublika prezidentınıñ Vladimir Putinnıñ täqdimnären yaqlap, Tatarstanğa Rusiä citäkçelegeneñ uñay mönäsäbäten saqlap qalırğa tırışuı sizelä. Mondıy şartlarda däwlät xakimiäte belän bäyle bulmağan ğalimnär, cämäğät eşlekleläre üzlären niçek xis itä soñ? Älegä xalıq deputatı Marat Ğälievnıñ häm qayber liberal fikerle ğalimnärneñ respublika xoquqların yaqlap äytkän süzläre genä işetelde. Häm, nihayät, elekke yıllarda üzen Sozidanie ictimaği xäräkäten oyıştıruçı bularaq tanıtqan Ayrat Şäripov yañadan säyäsi mäydanğa çığa başladı. Tatarstandağı möstäqil FM radioları aşa şimbä köndezge säğät ikedä Kamal teatrı aldındağı mäydanda Sozidanie xäräkäteneñ mitingı ütäçägen xäbär ittelär. Bez Ayrat Şäripovqa şaltıratıp, anıñ bu xäbärne raslawın yäki inqär itüen soradıq. Ayrat Şäripov, çınnan da, 23 oktäberdä miting ütkärergä röxsät aluın äytte. Mitingnıñ töp teması – Zasçitim svoe pravo na svoy vıbor rukovoditelya respubliki. V zasçitu demokratiçeskix preobrazovaniy i svobodı grajdanskix prav v Tatarstane. Yäğni, mitingta respublika xalqınıñ üz citäkçesen yaqlaw xoquqı, demokratie häm watandaşlarnıñ ireklären saqlaw, möstäqil oyışmalarnı häm grajdannarnı, Konstitutsiäne häm saylaw xoquqın yaqlaw öçen berläşü, tuplaw xaqında süz baraçaq älege mitingta.
Tatarstan wäkilläre bu könnärdä Mäskäwdä uza torğan Rusiä-İtaliä arasındağı eş törkemeneñ utırışında qatnaşa. Respublikanıñ Säwdä ministrı Xafiz Salixov citäkçelegendäge delegatsiä ike ilneñ urta häm keçe eşmäkärläre arasındağı xezmättäşlekne üsterü turında söyläşä. Tatarstannıñ başqalasında isä, bu könnärdä Qazan däwlät universitetınıñ 200 yıllıq yubileyına äzerlek bara. Uqu binalarında tözekländerü eşläre 10 noyäbergä tämamlanırğa tieş. Ul arada atna sayın diärlek universitetta törle fänni-ğämäli cıyılışlar ütep tora, älege uqu yortı süräte belän poçta markaları çığarıla. Qazan da üzeneñ meñyıllığına äzerlänä. Bäyräm uñayınnan Tatarstannıñ başqalası Mäskäw belän xezmättäşlek turında kileşte. Anıñ nigezendä başqalanıñ Kirov uramı üzeneñ isemen Mäskäw uramına alıştırdı. Şunlıqtan, xäzer mäskäwlelär Qazannıñ älege şaqtıy ğına şapşaq häm cimerelgän uramın tözekländerergä niätlilär.
Gölnaz İlgizär
