Äylänä-tirä möxitne saqlaw, bügenge köndä keşelek aldında torğan töp burıçlarnıñ berse. Qayber ekolog –belgeçlärneñ fikerlärenä qarağanda, bügenge köndä keşelek dönyası kiläçäk buınnar xisabına yäşi. Yäğni, kiläçäktä başqa buın qullanırğa tieşle bulğan tabiğät baylıqların da qullanabız bulıp çığa. Monısı ber xäl. Ä menä, tabiğätne çista itep, tormış, kön itärlek däräcädä aldağı buınğa tapşıru- üze ber problema bulıp tora. Belgeçlär çañ qağa, tabiğät faciğägä duçar dilär alar. Ayırım, ğadi keşelärneñ tabiğätne çüpläwennän alıp, olı-olı şirkätlärneñ tabiğätkä global' däräcädä zarar saluların bergä xisaplıylar. Keşe tabiğätne, äylänä-tirä möxitne çığanaq bularaq qına qullana, qäderlämi dip belderälär.
Tatarstannıñ ekologiä häm tabiği resurslar ministrlığı, tabiğät-anağa xörmät tärbiäläw maqsatınnan, yıl sayın “EKOlider” häm “Keşe häm tabiğät” dip atalğan bäygelär ütkärä. “EKOlider” digän bäyge törle şirkät, oyışmalar arasında uza. “Keşe häm tabiğät” bäygese isä jurnalistlar arasında bula. Kem tabiğät'ne saqlaw temasına äybäträk yazma icat itkän yänäse. Sişämbedä Qazanda bıyılğı bäygelärgä näticä yasaw buldı. Ayrat Gäbdinov, Mälikä, Renat Xarisov kebek tanılğan sänğät eşlekleläre qatnaşqan bu çara “Qazan” milli-mädäni üzägendä uzdı. “EKOlider” bäygesendä bıyıl 150 şirkät yäki oyışma qatnaşqan. “Tabiğätne pıçratunı kimetü eşe öçen” dip atalğan nominatsiädä Tübän Qama köpçäk çığaru şirkäte ciñüçe dip iğlan itelde. Çüp-çarnı yañadan eşkärtü texnologiäläre öçen berençe urınğa, şulay uq, Tübän Kamanıñ “Ekologiä” cämğiäte layıq buldı. “Tatenergo” cämğiäte isä “iñ uñışlı ekologik programma” digän nominatsiädä berençelekne aldı. “EKOlider” konkursınıñ gran-prie belän “Tatneft'” büläklände.
Jyuri “Keşe häm tabiğät” bäygesendä qatnaşqan respublika mäğlümat çaraları arasında berençelekne berkemgä dä birmäskä digän qarar çığarğan. Şähär häm rayon matbuğat çaraları arasında isä berençe urınnı , şulay uq, Tübän Qama jurnalistı Yelena Sabakayeva aldı. Respublika prokurorı Kafil Ämirov bäygeneñ maxsus büläge belän büläklände. Ni öçen dip aptıramağız, prokuror äfände elek fotojurnalist bulıp eşlägän keşe. Ul xäzer dä bu şöğelen taşlamağan, menä bäygedä dä tabiğätne saqlaw temasına töşerelgän foto belän qatnaşqan.
Oyıştıruçılar, menä şundıy bäygelär belän, xalıqta tabiğätkä saq qaraş buldırırğa teli. Kimendä, ekologiä xalätenä iğtibar yünältüne maqsat itep quyabız, dilär alar. Çınlap ta, tabiğätne saqlaw härwaqıt, anı yañadan torğızuğa qarağanda oçsızraq bit. Räfis Cämdixan.
