Säbäbe - yaña yıldan kommunal' xezmät kürsätü häm arendağa tüläw öçen bäyälärneñ küpkä artuı. Mäğlüm bulğança, moña qädär bina öçen tüläwlärneñ berniqädär öleşen tatar eşmäkärläre, ä kübesen, zur qıyınlıqlar belän bulsa da, moxtariät räise Xaqim Sadıykov üze tüläp kilä ide. Tüläwlärneñ şulay kisken artuı turında ul moxtariätneñ çirattağı utırışında idärä äğlälärenä citkerde. Äytergä kiräk arendağa alınğan bina şähär üzägendä urnaşqan bulğanlıqtan, elek tä tüläw şaqtıy zur summanı täşkil itä ide. Xakim äfände süzlärençä, 3 yıl eçendä barlıq tüläwlär 200 meñ sumnan artıp kitkän. Xäzer isä, şähär şurasınıñ yaña qararı buyınça, xätta kommersiä belän şöğellänmäwçe oyışmalar, şul isäptän tatar moxtariäte dä, arenda bäyäsen 6 märtäbägä artığraq tülärgä tieşlär. “Şäxsän minem andıy summanı tülärgä mömkinlegem yuq, häm 2005 yılğa arendalaw buyınça kileşü tözi almıym, binadan baş tartırğa turı kiläçäk, -dide moxtariät räise.
Moxtariät aktivı bu problemanı çişü yulın ezläp ozaq baş wattı. Ölkä , şähär başlıqlarına, şähär şurasına möräcäğät itep qararğa digän täqdimnär yasaldı. Ämma, mondıy yullar ütelgän, böten işeklär küp tapqırlar şaqılğan dip Xakim Sadıyqov küp täqdimnärne kire qaqtı. Şulay da, törle instansiälärgä tağı ber märtäbä xatlar yazıp qararğa, tiz könnärdä tatarlar öçen cıyın oyıştırırğa, anda alda torğan saylawlarda şähär başlığı wazifasına däğwä itüçe, bügenge köndä ölkä başlığınıñ berençe urınbasarı bulıp eşläwçe Viktor Şreydernı çaqırırğa, häm bu problemanı anıñ aldında quyarğa digän qarar qabul ittelär. İnde bina häm arenda mäs`äläse niçek xäl iteler, moxtariät üz urınında qala alırmı – kiläse xäbärlärebezdä beldererbez.
Qısqa ğına mädäni xäbär. Bol'şereç'ye rayon üzägendä eşläwçe “Bolğar” häm Ülänkül awılınıñ “Naza” ansambl'läre şuşı könnärdä “xalıq” isemen raslaw buyınça imtixan tottılar. Ölkä mädäniät Ministrlığınnan maxsus kilgän, kürenekle sänğät belgeçlärennän torğan komissiä ike kollektivnıñ da çığışın yuğarı bäyäläde, ansambl'lär “xalıq” isemen layıqlı yörtälär dip taptı. Dörestän dä, 16 yıl eşläp kilüçe “Naza” häm 8 yıl elek oyışqan “Bolğar” ansambl'läre başqaru ostalıqların yıldan-yıl şomarta baralar, kümäk başqarıla torğan cırlarnı berniçä tawışqa bülep cırnı maturlıylar, yaña iyüllär öyränälär, kollektivlarına yäşlärne cälep itälär.
Rozaliä Sayganova, Omski.
