Accessibility links

Aq barsnıñ medal’lärgä yulı ciñel tügel


Tatarstandağı barlıq xokkey söyüçeläre bu könnärdä yaratqan komandaları öçen qayğırtıp yäşi. Çönki xokkey buyınça Rusiä çempionatında iñ qızıqlı waqıt – play-off uyınnarı bara, dimäk, medal’lär öçen köräş qızğannan-qıza. Respublikanıñ ike klubı – Qazannıñ Aq barsı häm Tübän Kamanıñ Nefteximigı da bu aralarda yarımfinalğa çığu öçen köräşte. Berençe ike uyınnı ike komanda da üzlärendä – Qazanda häm Tübän Kamada ütkärdelär. Nefteximik öçen Mäskäwneñ Dinamo klubı belän älege ike uyın da ciñelü belän tämamlandı. Düşämbe könne Mäskäwdä uzğan matç ta Tübän kama canatarların berni belän dä şatlandırmadı. Nefteximik Dinamo komandasına 1-2 xisabı belän birelergä mäcbür buldı. Şulay itep, Nefteximik 3 märtäbä ciñelep medal’lär öçen köräştän töşep qaldı.

Qazannıñ Aq Bars komandasınıñ uyınnarı isä tağın da zur qızıqsınu uyattı. Nik disäñ, Rusiä superligasında ul dönyadağı iñ zur yoldızlar uynağan komanda. Aq barsnıñ citäkçelege Qazannıñ meñyıllığına büläk itep Rusiä çempionatınıñ altın medalen yawlarğa teläp, şuşı maqsatqa ireşü öçen bernindi mömkinçeleklärne dä jällämäde. Xäzerge köndä komandada dönya xokkeyınıñ iñ qimmät bäyäle xokkeyçıları uynıy. Şuña da, Aq bars komandasına mönäsäbät tä Rusiä xokkey dönyasında tiskäre disäñ, döresräk bulır. Xäyer, play-off uyınnarında xätta çit ilneñ şuşı bilgele yoldızları da yärdäm itmäde. Öydä ütkän uyınnarda Aq bars üzeneñ canatarların borçuğa saldı. Yaroslavl’nıñ Lokomotiv klubına alar 1-2 häm 3-4 xisabı belän ciñeldelär. Zur ömetlär bağlanğan Nikolay Xäbibullin da üzeneñ komandasınıñ qapqasın Lokomotiv uyınçılarınıñ höcümnären yaqlap qala almadı. Bu xaqta küp kenä Mäskäw mäğlümät çaraları şatlanıp, qazanlılarğa çit il yoldızları da bulışa almadı, dip yazıp çıqtı. Xäyer, Qazan canatarları da iñ möhim matçlardağı rättän ike ciñelü öçen Aq bars xokkeyçılarına üpkälären yäşermäde.

Düşämbe könne Yaroslavl’da uzğan öçençe uyın Qazan klubına medal’lär öçen köräştän töşep qalmawda soñğı ömet ide. Bälki şuñadır, komandanıñ baş trenerı Zinnätulla Biläletdinov bu uyınğa qapqaçı itep ömetlärne aqlamağan Xäbibullinnı tügel, ä Kanadadan kilgän uyınçı Fred Breytweytnı bilgeläde. Äytergä kiräk, bu qarar bik döres bulıp çıqtı. Breytweyt matç däwam itkän 3 periodta ğına tügel, ä annan soñ bulğan 10 minutlıq östämä waqıtta da üzeneñ qapqasına ber genä dä alqa kerttermäde. Xäyer, şunısın da äytergä kiräk, Lokomotivnıñ qapqaçısı Mark Lomot ta Aq barstağı kollegasınnan qalışmadı. Anıñ qapqasına da qazanlılar taşlağan ber genä alqa da kerep citä almadı. Şulay itep, 70 minut barğan uyın ciñüçene bilgelämäde. Östämä waqıttan soñ bullitlar bilgelände. Alarnıñ sanı şaqtıy bulsa da, ä här komandadan konkurentlarnıñ qapqasına 11şär keşe höcüm itte, xisap nibarı 2-3 kenä buldı. Soñğı xälitkeç alqanı Kanada xokkeyçısı aqbarslı Deni Xetli kertte. Ul qazanlılarğa bik möhim häm kötelmägän diärlek ciñü kiterde häm Aq bars komandasına yarımfinalğa çığu öçen köräşne däwam itärgä mömkinçelek tudırdı. Ä tamaşaçılar isä düşämbe kiçendä 3 säğättän artıq barğan därtle häm qızıqlı uyın qarıy aldı. Bu uyın Tatarstan sport söyüçeläreneñ inde sünep barğan ömetlären yañarttı. Alar aqlanırmı, yuqmı – monısın kiläse uyınnar kürsäter. Sişämbedä Yaroslavl’da Aq Bars belän Lokomotiv yañadan oçraşaçaq. Qazan komandası bu matçta da ciñü yawlıy alsa, yarımfinalğa çığu öçen 5 uyın yänä Qazanda bulaçaq. Xäzergä Aq bars canatarlarına barı tik kötärgä genä qala.

Gölnaz İlgizär

XS
SM
MD
LG