Tabiblar arasında tatar balaları bik küp inde ul. Häm çağıştırmaça iñ uñğannarı da alar diärgä buladır. İlbaşı Yel''sinnıñ üz yörägen näq tatar keşesenä ışanıp tapşıruı da şunı kürsätä. Sember cirendä dä tatar millätennän bulğan tabiblar iñ ışanıçlılardan sanala. Danlıqlı neyroxirurg Täwfiq Biktimerov, mäsälän, oluğ ğalim dä bularaq, Ul''yan Däwlät universitetınıñ prorektorı wazifaların da başqara. Ölkä xastaxanäsendä citdi operatsiägä moxtac awırular İldus Ğomärewkä çiratqa yazılalar. Ul 2003-yıl buyınça ölkäneñ iñ yaxşı xirurğı isemenä layık bulğan ide. Ä uzğan yılda şundıy uq isem Aşığıç yärdäm xastaxanäse xirurğı Säydäş Şämsetdinowkä birelde. Anıñ turında küp yaxşı fikerlär işetergä turı kilgängä, oçraşıp söyläşü teläge dä tudı. Awırular aña barı tik räxmät süzlären genä äytä, ä kollegaları üzlären anıñ şäkertläre dip sanıylar.
Säydäş Mirqasıym ulı Şämsetdinow Tatarstannıñ Bua rayonı Adav-Tolımbay awılında tuğan, Qazan meditsina institutın tämämlağan, Sembergä eşkä yunältelgän. Monnan anı ike yılğa armiägä dä alğannar. Xärbi xezmättän soñ yänä Sembergä qaytqan. 30 yıl inde – qulında skal''pel''.
Äñgämädän ike sorawğa cawapları ayıruça iğtibarğa layıqtır. Çağıştırmaça xirurglar arasında tatarlarnıñ zur abruyın ul tatar xalqında cawaplılıq xiseneñ köçle buluı, awırularğa keşeçä mönäsäbät qannan kilüe belän añlattı. Tağın ber möhim säbäp: alarnıñ küpçelege Qazan meditsina institutında belem alğannar. Ä bu danlıqlı uqu yortınıñ traditsiälärgä bay buluı, andağı uqıtuçılarnıñ yuğarı kvalifikatsiäse – studentlarnıñ da şundıy uq yuğarı däräcäle belgeç bulunıñ töp şartı.
“Kolxoz räisläre, xirurglar arasında tatarlar baytaq. Mäsälän, elek ölkäneñ baytaq qatnaş xalıqlı rus awıllarında kolxoz räise bulıp tatar balaları eşlilär ide. Äle dä awıllar citäkçeläre arasında alar küp. Tabiplar da küp. Ä menä mäğärif, mädäniät ölkäsendä, bigräk dä bu tarmaqlarnıñ idärälärendä tatarnı oçrıym dimä. Monıñ säbäben närsädä küräseñ?” – digän sorawğa ul: “Uylabraq cawap birergä kiräk”, - dide. Häm menä nindi fikergä kilde: “Awıl xucalığında häm meditsinada eş milli mänfäğätlärgä qağılmıy. Qulıña skal''pel'' alğanda awırunıñ nindi millättän ikäne turında uylamıysıñ: aldıñda KEŞE. Şulay uq awıl xucalığında da töp burıç – tırışıp eşläw. Tatarnıñ tırışlığı ğomummäğlüm inde. Ä menä mäğärif yäki mädäniät ölkäsendä milli ixtıäclarnı qanäğätländerü alğa kilep basa. Ägär tatar keşese idärä başlığı bulsa, anıñ Mäskäw säyäsäte quyğan yunäleştän taypıluı ixtimal. Näticädä urıslaştıru säyäsäteneñ aqsawı mömkin.
Menä şulay uylıy xirurg Säydäş Şämsetdinow.
“Azatlıq” radiosı, Ayrat İbrahim, Sember.
