Accessibility links

Кайнар хәбәр

Rusiä tarixi şähärlär häm töbäklärneñ VI kongressı uzdı


Tarixi şähärlär häm töbäkläreneñ Rusiä Berlege berlegenä 32 töbäk, 208 şähär häm rayon kertelgän. Comğa könne berlekkä yaña äğzalar qabul itelde. Alar arasında Tatarstannıñ Layış rayonı Nikol'ski awılı häm Tübän Qama şähärläre bar ide. Nikol'ski awılınıñ tarixi şähärlär Rusiä Berlegenä kertelüe yıl sayın uzdırılıp kilä torğan Karavon fol'klor bäyräme belän añlatıldı. Tübän Qamanıñ tarixi şähär isemlegenä niçek elägüe añlaşılmadı. Çönki anıñ şaqtıy yäş häm başqa küp kenä qalalardan bernärsäse belän dä ayırılmağanı mäğlüm.

Tarixi şähärlär häm töbäkläre Rusiä Berlegen kebek oyışma barlığın işetmäwçelär dä şaqtıydır. Kongressta küpmeder däräcädä anıñ YUNESKO eşen qabatlawı äytelde.

Yaña şähärlärne alu, YUNESKO tarafınnan qabul itelgän ruxi mirasnı saqlaw buyınça Xalıqara Konvensiäne tikşerüdän häm törle sessiälärdän tış Rusiä Berlegeneñ närsä belän şöğellängäne mäğlüm tügel. Tağın şunısı qızıq, tarixi şähärlär häm töbäkläreneñ Rusiä Berlege äğzası bulğaç, yıl sayın tüläw qaralğan. Rusiä subyektlarına ul 50 meñ häm här yäşägän keşe sanına qarap 3 sum östälä.

Qazanda uza torğan kongressta töp temalar itep - däwlät orğanı wäkilläre belän tığız elemtä urnaştıru, fol'klor, etnomädäni traditsiälärne saqlaw, ruxi mädäni miras obyektları xälen tikşerü häm finanslaw buyınça mä’sälälärne qaraw tora ide. Ämma waqıt tar bulu - medal' tapşıru, ber-bereñä räxmät süzläre äytü kebek qupşı eşlär näticäsendä, älege problemalarnı tikşerügä azraq waqıt qaldı. Problemalar kisken torsa da.

Bügenge köndä däwlät tarafınnan saqlanırğa tieşle 80 meñ tarixi häm mädäni häykällärneñ barı 35 protsentı urtaça xäldä buluı mäğlüm. Tizdän uzaçaq cirle üzidarälär buyınça reformalardan soñ ruxi mirasnıñ nindi yazmışqa duçar iteläçäge turında älegä uylarğa da qurqıta. Çönki üz-üzen tuydırırğa tieş bulğan munitsipal' berämleklär citäkçeläreneñ häykäl öçen aqçaları citmäskä mömkin.

Landış Xarrasova

XS
SM
MD
LG