“Azatlıq” radiosın tıñlawçılar xäbärdar, iyün ayı urtasında gazetanıñ xäle qıl oçında ide. Poçta xezmätkärläre yalğışlığı belän kataloktağı bäyä ike märtäbä artıq itep kürsätelde. Bu xäldän soñ, “Yañarış”nıñ baş möxärrire wazifaların ütäwçe Alsu Sägitova törle mäğlümlät çığanaqlarında “çañ suqtı”, köndä dip äyterlek, yazılu bülege başlığı Svetlana Mixaylovanıñ “telefonınnan töşmäde”. Kürsätmä birüne ütende. Yalğış bäyä-138 sum tüläp yazılğannarğa kire aqçaların qaytarunı taläp itte. Bülek başlığınıñ kürsätmäse poçtalarğa barıp ireşte, aqçalar da kire qaytarıldı. Häm menä Tömän ölkäseneñ federal' poçta elemtäse rayonnardan barlıq mäğlümatlarnı cıyıp beterde, häm 3169 ğailä yazdırğan dip xäbär itte. 2005 nçe yılnıñ berençe yartısında “Yañarış”qa yazıluçılarnıñ sanı 2800 genä ide.
Döres, yıldağı ğädätkä kürä, yärdäm qulı suzuçılar da yuq tügel. Mäsälän, Tübändäwde rayonı başlığı Zöfär Äxtäriev tatar awıllarınıñ 5 mäktäbenä häm 5 kitapxanäsenä yazdırttıq dip xisap tota. Alsu Sägitova äytüençä, tumışı belän Tübäntäwde rayonıñ Kinderle awılınnan bulğan Qazanda yäşäwçe şağir Şäwkät Sibgatullin millättäşlär yazılsın dip 10 meñ sum aqça cibärgän. Rusiä federatsiäseneñ atqazanğan uqıtuçısı Tabul rayonınıñ Maslaw awılında yäşäwçe Räşidä apa Baqieva üze, öydän-öygä yörep, 50 keşene yazdırğan. Tömän däwlät universitetı ğalimäse Xänisä Alişina filalogiä fakul'tetında tatar telen dä üzläşterüçe studentlardan ğına tügel, ä uqırğa kerergä teläge bulğan abiturientlardan da “Yañarış” qa yazılu kvitansiäse taläp itä.
10 nçı iyül poçta xezmätkärläre köne uñayınnan “Yañarış” üzeneñ tağın ber şundıy tınğısız yöräkle yärdämçese turında yaza. Yalutr rayonınıñ Yaña At'yal awılında 30 yıl buyı poçta xezmätkäre bulıp eşlägän Roza apa Gaffarova yäşi. Layıqlı yalda buluğa qaramastan Roza apa çın küñelennän zur eş başqara. Ul awıldaşların “Yañarış” gazetasına yazılunı oyıştırıp qına qalmıy, ä kürşe tirädäge tatar awılların da yörep çığa. “Öydä nişläp yatasıñ, ä bolay ber uñaydan kürşe awıllarda yäşäwçelärneñ xäl-äxvällären dä beläseñ, yaratıp uqı torğan gazetaga da yazdırasıñ”,- di Roza apa.
“Azatlıq”nı tıñlawçılarğa, “Region-Sibir'» gazetası üzeneñ eçtälegen tulısınça üzgärtep, Tömän ölkäseneñ könyağında yäşäwçe tatarlar tormışı turında yaza başlawı turında, xäbär itkän idek. Anda mäqälälär urıs telendä basıla. 5 nçe iyül könne anıñ üzgärgännän soñ 5 nçe sanı dönya kürde. Mondağı här mäqälä dä dip äyterlek milli tormıştağı problemalarnı barlıy. Yawızbı mäktäbe yabılırmı, Yambay muzeynıñ xäle niçek bulır, Tabul pedkolledjına aqça tüläp uqırğa kererlärme, ölkädäge tatar mädäniäte krizis kiçeräme häm tağın bik küp sorawlar quya.
Ölkädä bara torğan optimizatsiä säyäsäte bıyıl 1 nçe sentäbergä Tömän rayonınıñ Yawızbı başlanğıç mäktäben yabarğa tieş. Ämma äti-änilär balaların kürşedäge Şıqça awılına urta mäktäpkä cibärmibez dilär. Yawızbıda 1 dän alıp 4 nçe sıynıfqa qädär 30 bala uqı. Yabu säbäbenä kilsäk, mäktäpne totu biq qıybatqa çığa ikän. Ämma äti-änilär äytüençä, remontı da alar üzläre yasıy, kitaplarnı da üzläre satıp ala, rizıq öçen dä, aş peşerüçene totqan öçen dä üzläre tüli. Uqıtuçınıñ xezmät xaqı häm cılıtu belän elektr utı ğına xakimiätlär cilkäsenä qala.
Ägär dä barlıq Yawızbı uquçıları da, başlanğıçlar häm 5 nçe sıynıftan başlap 11 gä qädär, Şıqçağa yöri başlasa, 20 utırğıçı bulğan avtobusqa 4 reys yasarğa kiräk bulaçaq. Könnän kön benzin bäyäse artıp utırğan bu zamanda ul qıybatqaraq çığaçaq. Avtobus barlıq däreslär betkäç kenä quzğala. Ä könenä 4 säğät uqığan keçeräklär, 7 är säğät uqıy torğan ölkännärne, kötmiçä täpi-täpi atlıybız dip qarına, buranına, 40 däräcä suığına, orıp yawğan yañğırına qarap tormıyça maşinalar tız-bız kilep torğan yulğa çığarğa mömkin. Andıy mondıy xäl bula qalsa, alarnıñ iminlege öçen kem cawap biräçäk soñ? “Region-Sibir'» gazetası bu problemanıñ çişeleşen alğa taba da yazıp torırğa wäğdä itä.
Nail Alan. Tömän.
