Çärşämbe könne, Tatarstanda töp iğtibar, Rusiäneñ Eçke eşlär ministrı Räşit Nurğalievnıñ kiälüenä qarata buldı. 27 yul irtäsendä ul kilep citte, Yul iminlege inspeksiäseneñ yaña binasın açuda qatnaştı. Annan soñ, Tatarstan Prezidentı belän oçraştı. Räşit Ğömär ulı Nurğaliev Tatarstan öçen çit, yat keşe tügel. Anıñ ätise, Ğömär Nurğaliev Qazanda yäşi, Tatarstanda anıñ tuğannarı bar. Berniçä yıl elek Räşit Nurğaliev, awıldağı tuğannarın kürergä, dip saban tuyına da qaytıp kilgän. Räşit Nurğaliev üze Qazaxstanda tuğan, Kareliädä, Däwlät İminlege komitetında eşläp kitkän, şunnan Mäskäwdäge oyışmalarnı citäkläwgä qädär üsep citkän. Anı, oppozitsion gäzitlärneñ, kiläse Tatarstan Prezidentı bula alırlıq nämzät itep atağanı da buldı. Häm menä, çärşämbe könne ul Qazanğa kilde. Biredä ul Tatarstandağı kriminal xäl, tärtip saqlaw oyışmalarınıñ yartı yıllıq eş näticäläre, 1000 yıllıqqa äzerlek mäsälälärenä bağışlanğan kiñäşmälärdä qatnaşa. Könneñ berençe yartısında, Tatarstan Prezidentı belän oçraşqanda ul, matbuğat öçen belderülär yasadı. Mäsälän ul, «Qazannıñ 1000 yıllığına bağışlanğan çaralarda iminlekne tä’min itü öçen bar köçebezne quyaçaqbız» dide. Şulay uq ul, «yartı yıl eçendä eş näticälären tikşerep, böten citeşsezräklärne açıq itep äytep, söyläşerbez» dide. Ministr, şulay uq, Tatarstanda terrorğa qarşı alıp barılğan köräş näticälären yuğarı bäyäläde.
Ä şul arada, Qazannıñ 1000 yıllığına äzerlek qısalarında alıp barıla torğan öyränülär däwam itä. Çärşämbe gäzitläre Qazannıñ Sovet rayonında, Semberdän kilgän militsiä xezmätkärläreneñ qılğan ğämälläre turında yazıp çıqtı. Üzläre belän pasport bulmağan keşelärne totqarlaw, barmaq ezlären alu, militsiä mäğlümat bazalarınnan şäxesne ezlätü oçraqları bulğan. Militsiä wäkilläre beldergänçä, andıy öyränülär, Qazannıñ här rayonında qabatlanaçaq, şuña här kemgä, kön sayın, üze belän şäxes tanıqlığın yörtü sorala. Öyränülär waqıtında, tikşerergä, qulğa alırğa mömkinnär. Andıy tikşerülär waqıtında, Qazanda räsmi terkälü bulmağannar da, ara-tirä, ezlänüçe cinäyätçelär dä totıla. Läkin qanun bozmağan ğadi qazanlıylar da, qıyınlıqlarğa duçar bula.
Bikä Timerova.
