Rusiäneñ elekke atom energiäse ministrı Yevgeniy Adamov Şwetsariäneñ anı aldaşu ğäyepläwläre nigezendä Quşma Ştatlarğa tapşıru qararın ğämäldän çığaru öçen appelyatsiä mäxkamäsenä möräcäğät itär kebek. Bügen Jenevada Adamovnıñ advokatı Stefan Wehrenberg ul mäxkamägä möräcäğät itärgä mömkin, çönki Mäskäwneñ Adamovnı Rusiägä tapşıru taläbe östenlekkä iä bulırğa tieş dide. Şwetsariä Adamovnıñ AQŞ taläbe nigezendä uzğan May ayında qulğa alğan ide. Rusiä Adamovnıñ AQŞqa tapşırılmawı öçen tırışa, häm üze dä anıñ ilgä qaytarıluın sorap möräcäğät itte. Mäskäw Adamov AQŞqa Rusiäneñ atom serlären açarğa mömkin dip qurqa. Russiä yustitsiä ministrı Yuriy Çayka bügen Adamovnı AQŞqa tapşıru turındağı qararnı tänqitläp çıqtı.
"Bezneñ il belän Amerika Quşma Ştatları arasında ekstraditsiä turında ikeyaqlı kileşü yuq, şuña kürä min AQŞnıñ Adamovnı Rusiägä tapşıraçağına şiklänäm, häm min Şwetsariä monı isäpkä alırğa tieş dip uylıym" dide Çayka.
Prokurorlar Adamov ministr bulğan çaqta Rusiäneñ atom iminlegen yaxşırtu öçen birelgän 9 millionlap dollarnı urlağan dip belderä.
