11ноябрь könne Qazan Kremlendä Tatarstan Prezidentı Mintimer Şäymiev respublikabıznıñ Yazuçılar berlege räise İlfaq İbrahimovnı qabul itte. Äñgämä waqıtında İñbaşı respublikabızda baruçı ädäbi protsesslarnıñ barışı belän qızıqsınğan, ayırım alğanda yazılğan äsärlär öçen tülänä torğan gonorarlar küläme häm niçek tülänüe, yazuçılarnıñ matdi xäle, icat öçen şartlarnıñ nindi buluı xaqında süz barğan. Bilgele bulğança, kiläse 2006 yıl ike zur yubiley bilgese astında ütäçäk. Fevral' ayında Musa Cälilneñ 100 yıllığı bulsa, aprel' ayı böyek Tuqayıbıznıñ 120 yıllığı bäyräm iteläçäk. Yazuçılar berlege şuşı uñaydan törle çaralar programmasın äzerlägän. Tantanalar respublikabız här şähärendä, rayonında ütäçäk, Rossiä buyınça tatarlar kümäkläp yäşägän töbäklärdä törle yubiley çaraları qaralğan. İnde alarnıñ Yekaterinburg, Çiläbe, Orenburgta ütäçäge tögäl bilgele. 2006 yıl Tuqay yılı bulıp iğlan iteläçäge kötelä.
11 noyäber Musa Cälil teatrı üzeneñ yaña sezonın açtı. Comğa kiçendä opera söyüçelär Jorj Bize äsären qaradılar. “Ence ezläwçelär” spektaklendä teatr truppasınıñ iñ ataqlı solistları uynıy. Baş rejisser Tatarstannıñ häm Qazaqstannıñ xalıq artistı Renat Salavatov. Bıyılğı sezonda premyeralar küp bulaçaq. Çönki repertuarda bulğan spektakl'lärne yañartırğa kiräk, alarnı yaña texnikağa yaraqlaştırırğa kiräk. Sezon yubileylarğa da bay. Tizdän tamaşaçılar Azat Abbasov häm Rusiäneñ, Tatarstannıñ xalıq artistı Venera Ğaniewa icat kiçälären tamaşa qılaçaq. Ä fevral'dä inde traditsiä buyınça Şalyapin festivale, 2006 yıl dönya küläm Mosart yılı bulıp bilgelänep ütäçäk. Bu uñaydan teatr Tılsımlı fleyta äsären säxnäläşterä. Anı Ğari Poter stilendäge moğcizalı äkiät itep quyığa isäplilär. Şulay uq 2006 yıl Tuqay häm Cälil yılı da äle, soñğı arada xalıq telendä Yevropanıñ küçmä teatrı isemen alğan kollektiv nihayät tatar tamaşaçısın da söyenderer dip kötelä. Tuqay Zöläyxa librettosı sezon axırında säxnä küräçäk. İcat kollektivı säxnägä Altınçäçne dä qaytarmaqçı.
Gölnaz Şäyxetdinova
