Tokyo. İke könlek räsmi säfär belän Yaponiägä kilgän Vladimir Putin, Rusiä prezidentı, Mäskäw häm Tokyo ikeyaqlı qarşılıqlarnı xäl itep, tağın da tığızraq mönäsäbätlär urnaştırır digän ömet belderde. Soñğı 5 yılda bu Putinneñ Yaponiägä berençe säfäre. Putin fikerençä, ikeyaqlı problemalarnı çişü mönäsäbätlärne yaxşırtuğa yul açar ide. Ul ber genä problemanı iseme belän atamadı, läkin şul mäğlüm - ikençe dönya suğışınnan soñ Rusiäneñ Yaponiä belän töp probleması bulıp könyaq Kuril utrawları tora. Suğıştan soñ şul 4 utraw sovetlar tarafınnan basıp alınğan ide. Säfäre barışında Putin ike il eşmäkärläreneñ forumında da qatnaşırğa tieş.
