Accessibility links

Кайнар хәбәр

"Kiçägese kiçä ide, bügengese - bügen"


Demirel: "Kiçä bulğan xäl kiçä uzğan, bügengese bügen, ä irtägese irtägä qaralaçaq mäsälä
Demirel: "Kiçä bulğan xäl kiçä uzğan, bügengese bügen, ä irtägese irtägä qaralaçaq mäsälä

Törkiäneñ oppozisiädäge dönyawi däwlätçelegen yaqlawçı cömhüriätçe xalıq partiase yawlıq mäsäläsenä mönäsäbäten üzgärtä. Törkiädän atnalıq küzätü.

Törkiädä bu atnada iñ küp bäxäs tudırğan säyäsi xäbär, xäzergäçä ilneñ dönyawi däwlätçelegen yaqlawnı maqsat itep quyğan cömhüriätçe xalıq partiase başlığı Deniz Baykalnıñ, yawlıqlı partia äğzalarına partia embleması bulğan tüş tamğaların tağuı buldı.

"Törkiädä xatınnarınıñ 70% yawlıq bäyli, päräncä kiyü Anatoliadä ğädäti küreneş", dip äytüe belän Bayqkal älege bäxäskä yaña borılış kertte. Ul üz partia häm säyäsäteneñ yawlıqlılar belän bernindi qarşılığı bulmawın belderde.

Yewropa-Törkiä urtaq parlament şurası citäkçelärennän Joost Lagendijk, bu atnada Törkiä parlamentına yasağan ziäräte waqıtında Baykalnıñ älege adımıñ "Törkiädä din ireklege öçen uñay adım", dip bäyäläde. Joost şulay uq, Baykqalnıñ yawlıqlı xatınnarğa qarşı säyäsäten üzgärtüe mine bik qatı şaqqatırdı, dip belderde.

Törkiäneñ 9-nçı prezidentı bulğan Süleyman Demirel, Baykalnıñ yawlıq kigän xatınnarğa partianeñ tüş tamğasın tağuınnan soñ tuğan bäxäs-tänqıilärneñ säyäsät tormışında ğädäti küreneş buluın äytte.

Demirel Baykalnıñ yawlıqlılarğa qarşı säyäsäten üzgärtü adımına cawap birep: "Kiçä bulğan xäl kiçä uzğan, bügengese bügen, ä irtägese irtägä qaralaçaq mäsälä", dip säyäsätneñ üzgärüçän buluın telgä aldı. Demirel: "Bügen belän irtägä arasında, forsatlardan faydalana belergä kiräk", - dip äytte.

Premyer Tayip Erdoğan isä sişämbedä parlamentta yasağan çığışı waqıtında Baykalnıñ bu adımın xuplap, partiase tarafınnan tawış cıyu maqsatında säyäsät üzgärtü tänqıytlärenä qaramastan, anı bu fikerennän baş tartmasqa çaqırdı. Erdoğan: "Ägär bu yünäleş çınnan da ixlas küñeldän başqarıla ikän, min bu üzgäreş artında torğan keşelärne täbrik itäm", dip belderde.


Törkiä, sportqa iğtibarnı arttıra

2008 Pekin olimpiä uyınnarınnan qulı buş qaytqan Törkiä, sportqa iğtibarnı arttıra. Törkiä xakimiateneñ yäşlärne narkotikka, xämer häm başqa naçar ğädätlärdän saqlaw öçen sport proyektlarına kübräk aqça bülep biräçäge xäbär itelä. Planğa qarağanda, xökümät cirle şähär xakimiatläre tarafınnan başlatılğan sport qorılmaları tözeleşläreneñ yartı çığım aqçasın tüläwne üz östenä ala. Däwlät planlaştıru şurasınıñ bu uñaydan yäşlär häm sport başqarma komitetına östämä 18 million lira birüe xäbär itelä.

Bu san 2009 yılda yaqınça 13 million dollarğa qädär arttırılaçaq.

Räsmilär bu adımnıñ sport çaraların üsterü häm şul uq waqıtta yäşlärne sälamät yäşäwe, alar arasında sportnı cäyelderü häm alarnı naçar xolıqlardan saqlaw maqsatında eşlänüen belderde.


Törkiä 9 könlek qorban bäyrämenä äzerlänä

Qorban bäyräme yaqınayğan şuşı könnärdä Törkiä xökümäte däwlät eşendä eşlägän xezmätkärlärneñ eş xaqı, bäyrämnän alda tülänäçäk dip belderde. Şulay itep 8 dekäberda başlanaçaq Qorban bäyräme aldınnan xalıq ixtıyacların qarşılıy alaçaq. Bıyıl räsmi bäyräm yallarınıñ 9 kön bulaçağı xäbär itelä.



Tawıq säwdäse krizisqa birelmi


Global iqtisadi krizis Törkiädä finans qorılmalarınnan qala, säwdä bazarın da üz täsirenä alğan şuşı könnärdä, qayber şirkätlär üseşen däwam itä.

Törkiädä tawıq ite, yomırtqa häm zäytun mayı citeştergän Keskinoğlu şirkätlär törkemeneñ satu bülege başlığı, krizisnıñ säwdä barışına bernindi täesir kürsätmäwen, kiresençä 2008 yılnı 30% üseş belän tämamlıyaçaqların belderde.

Soñğı 3 yılda 100 % üseş kürsätkän şirkät, 2009 yılda 25% üseş tabarğa planlaştıra.

XS
SM
MD
LG