Кытай Төньяк һәм Көньяк Кореяларны сөйләшүләргә өнди

Кытай тышкы эшләр министры Яң Җиечи Төньяк һәм Көньяк Кореяларны сөйләшүләр үткәреп Корея ярымутравында вәзгыятьнең кискенләшүенә юл куймаска чакыра.

Кытай тышкы эшләр министрлыгы белдерүенчә, Яң моны Русия тышкы эшләр министры Сергей Лавров белән телефон сөйләшүендә әйткән.

Яң Лавровка ярымутраудагы киеренкелек кулдан ычкынып бөтен төбәкне тетрәтергә мөмкин дигән.

Күптән түгел Русиянең БМОдагы илчесе Виталий Чуркин да шундый ук борчылу белдергән иде.

Бүген БМО Иминлек шурасы Төньяк һәм Көньяк Кореялар арасындагы киеренкелек турында сөйләшә.