Украинаның көнчыгышында ике ел дәвам иткән хәрби низаг сәбәпле, БМО мәгълүматларына күрә, 1,5 миллион украинга ачлык куркынычы яный.
Дөнья азык-төлек програмы мәгълүматларына күрә, 300 мең кеше азык-төлек җитешмәүдән иза чигә һәм алар кичекмичә ярдәмгә мохтаҗ. Украина хөкүмәте контролендә булмаган Луһан өлкәсенең аерым бер районнарында һәм кораллы низаг яклары чиге тирәсенә урнашкан авыл-калаларда яшәүчеләрнең азык-төлек белән тәэмин ителеше бигрәк тә начар, дип белдерелә.
Дөнья азык-төлек програмы һәр ай саен 270 мең кешене ашыгыч ярдәм белән тәэмин итәргә җыена. БМО якларны һуманитар ярдәмне бернинди каршылыксыз үткәрергә чакыра.
