Accessibility links

Кайнар хәбәр

Äxmät Zakayev Çeçnyağa qaytırğa äzer


Sörgendäge Çeçen separatist xökümäte wäkile Äxmät Zakayev, citäkçeläre Abdul-Xalim Sadulayev tarafınnan üzeneñ premyer-ministr urınbasarı wazifasınnan töşerüen belderde. Bu xaqta Zakayev Azatlıq radiosınıñ Tönyaq Kavkaz redaksiäsenä Londonnnan xäbär itte:

"Färmanda äytelgänçä, min mädäniät ministrı bulıp qalam. Minemçä, tizdän xökümättä tağın başqa üzgäreşlär kötelä."

5nçe fivraldä Exo Moskvı radiosına birgän äñgämäsendä Zakayev, ägär dä separatist citäkçelek taläp itsä, üzeneñ Çeçnyağa qaytırğa äzer bulğanın beldergän ide. Ğısyançılarnıñ internet säxifäsendä dönya kürgän färmanda Sadulayev, böten ministrlar Çeçnyada bulırğa tieş, dip beldergän. Çit illärdäge wäkillären Sadulayev üze bilgeliäçägen äytkän. Bu üzgäreşlär, Zakayev häm mäğlümat ministrı Movladi Udugov arasında ğısyançılarnıñ xalıqara qanun häm demokratiä mäsäläsendäge bäxäse säbäple bulğan dip farazlana. Udugov ta ministr urınınnan alınğan, dip xäbär itelä.
XS
SM
MD
LG