Mäskäw. Rusiäneñ qayber säyäsätçeläre, kiçä Groznıyda bulğan şartlawlarğa qaramastan Mäskäw, prezident Vladimir Putinneñ çäçän solıx planın ğämälgä quyunı däwam itärgä tieş dip belderä. Çeçnäneñ Mäskäw yaqlı xakimiate binasın şartlatu tağın, Rusiä anda üz-üzen yaqlıy alamı soñ digän soraw uyatsa da, Federatsiä Şurasınıñ saqlanu häm iminlek komitetı räise Viktor Ozerov bügen İzvestiä basmasında, Rusiä panikağa birelmiçä elekke säyäsäten däwam itärgä tieş dip yazıp çıqtı. Rusiäneñ Üzäk saylaw komissiäse räise Alexander Veşnäkov ta, martqa bilgelängän referendumğa äzerlek aldan qaralğança däwam itterelergä tieş dip belderde. Kiçä Groznıyda, şartlatqıç töyälgän ike yök maşinasınıñ xökümät binasına bärep kerüwe häm şunnan soñ bulğan şartlaw näticäsendä, soñğı xäbärlärgä qarağanda, kimendä 55 keşe hälak buldı, 250-dän artığı törle cäräxätlär aldı.
