19 may - Tatarstan matbuğatı köne

19 may kalendar bäyrämnärenä bik bay. Sovet zamannarında Pionerlar bäyräme dip bu könne baraban suqtıq. 1906 yılda näq 19 mayda bulaçaq Kamal teatrı spektakl' uynağan. Şul uq 19 may Xalıqara muzeylar köne dip isäplänä. Ä inde soñğı yıllarda 19 maydan jurnalistlar bäyräme, matbuğat köne tösmere sibelä başladı. Uzğan ğasır başında 1905 yılda berençe tatar gazetası “Nur”nı çığaru öçen röxsät qäğäze xästärläwneñ datası, yäğni 19 may – Tatarstan matbuğat köne bularaq ütkärelä. Meñnän artıq Tatarstan jurnalistlarınıñ hönär bäyräme bu. Kiçen Zur tamaşa zalında jurnalistlar bäyräme tantanalı räweştä ütkärelä. Anda bıyılğı “Bällür qäläm” iäläre bilgelänä, iñ yaxşı jurnalistlar üzlärenä täğäyenlängän büläklär ala. Här yıl sayın distälägän yoldızlar üzlären jurnalistikanıñ iñ zatlı ostası itep xis itä torğan köndä hönär qazanışları yäki citeşsezleklär turında citdi söyläşü urınlı tügel. Xökümät isemennän iğlan itelgän täbrikläw tekstında, Tatarstanda matbuğat eşçeläre, xezmätkärläre, jurnalistlar yaxşı eşli, bu tarmaq xäzer yañarış protsessına ayaq bastı, dip äytelgän. Jurnalistlarğa, bäşirlärgä, poligrafçılarğa xökümät isemennän yaxşı teläklär äytelgän, alarğa üz hönärenä tuğrılıqlı qaluına, keşelärneñ ışanıçın aqlawına ömet belderelgän.

Bıyılğı matbuğat bäyräme räsmi xuca tabılır-tabılmas xäldä ütä. Matbuğat ministrlığı ike yıl elek beterelgän ide, bu eşlär başqarğan elemtä ministrlıqlarınnan jurnalistlar ayırılıp başqa çığa, ä yaña tözelgän “Tatmedia”äle tuu xälendä, yäğni anıñ eşçänlege äle cayğa salınmağan. Şuña kürä bıyılğı bäyräme ömetlär, şiklänülär, nindider eçke işarälär häm bilgesezleklär şartlarında ütä. Xäyerlegä bulsın.