Mäçet açu tantanasınıñ ber uñay näticäse tormışqa aştı da kebek. Eş menä närsädä. Tantanada Yevraziä firqase liderlarınnan berse Pavel Borodin da qatnaştı. Başta ul matbuğat konferensiäse oyıştırdı. Sember tatar cämäğätçelegen iñ borçığan närsä – qaya qarama möselmannarnıñ, ikegä bülenep, qapma-qarşı toruı. Uzğan saylawlar waqıtında “Refax” belän “Mäcles” firqäçekläre üzara köräştelär. Bu yulı – ike ”Yevraziä”. Monıñ säbäpläre, kemgä faydalı buluı turındağı sorawğa Pavel Pavloviç cawap birmäde. Cawap urınına Aziä öleşeneñ möhimlege turında süz tottı. Sorawnı qabatlaw da näticä birmäde.
Şulay da anıñ belän oçraşu faydalı buldı. İmamnar ğozerenä cawap itep ul ölkä üzägendäge 6 mäçetkä märxümnärne cirlägändä faydalanır öçen 6 UAZ avtobusı wäğdä itte. Ay yarım eçendä bulır, dide. Ä cir arendası öçen 110 000 sum sorağanğa: “Tüläw öçen sçet biregez, irtägä ük tüläner”, - dide. Qısqa häm anıq cawap.Mäçet açu tantanasın räsmi yaqtan tanılmağan Fatix xäzrät Aliullov alıp bardı. Räsmi möfti Säwbän Söläymanov ta üz tarafdarları belän kilgän ide. Läkin alar artta basıp tordılar da kittelär. Säbäbe dä añlaşıla: Tälğät Tacetdin “başqa” Yevraziä yağında. Aleksandr Duğinlı Yevraziä yağında.
Ayrat İbrahim, Sember.
