Ğiraq suğışına ber yıl: dönya buylap protest çaraları uza

Ğiraq suğışı başlanunıñ ber yıllığın bügen dönya cämäğätçelege uram cıyınnarı belän bilgeläp ütte. Suğışqa qarşı çaralar Awstraliäneñ iñ zur şähäre Sydneyda başlanıp kitte, anda 3 meñgä yaqın keşe qatnaşqan bulsa, Melbourne, Brisbane häm Perth kebek keçeräk şähärlärdä uramnarğa çığıp suğışqa qarşılıq belderüçelärneñ sanı kübräk bulğan. Seoulda demonstratsiägä meñ yarım keşe çıqqan, alarnıñ küpçelege – studentlar ide, dip xäbär itelä. Tokyoda uramnarğa çıqqan berniçä meñ keşe Yaponiäneñ Ğiraqqa meñ keşelek ğaskär cibärü qararına qarşılıq belderde. Yevropanıñ zur şähärlärendä dä bügen suğışqa qarşı uram cıyınnarı uzdı, Amerika Quşma Ştatlarında da yaqınça 200 urında protest demonstratsiäläre üter dip kötelä. Londonda uram cıyınına 25 meñgä yaqın keşe qatnaşqan, anda yäşellärneñ Greenpeace xäräkäteneñ ike wäkile Big Ben säğat manarasına mengän ide, alarnı politsiä qulğa alğan. İtaliädä sulçılar, hönär berlekläre häm globalizatsiägä qarşı xäräkät aktivistları üz tarafdarların bügen kiçkä cıya.

Mäskäwdä uramnarğa çığuçılar Çeçnya häm Ğiraq suğışına protest belderde.