Rusiäneñ tışqı eşlär ministrlığı, kiçä kiç Bağdadta totıq itep alınğan "İnterenergoservis" şirkäteneñ sigez xezmätkäre azat itelüe xaqındağı mäğlümätne rasladı. Tışqı äşlär ministrlığı belderüenä qarağanda, öçese Rusiä, bişese Ukraina watandaşı bulğan keşelär Rusiä tırışlığı belän azat itelgän. Ğiraqtağı Rusiä watandaşlarına bu ildän kitärgä tägdim itelmäsä dä, bu xaqta Rusiäneñ Tışqı eşlär ministrı Sergey Lavrov, "Kitü-kitmäw qararın şirkätlär üzläre qabul itärgä tieş. Ägär iminlekne tämin itär öçen xökümätneñ yärdäme taläp itelä ikän, ul yärdäm äzer häm kürsäteläçäk" dip belderde. Äl-Cäzirä telekanalınıñ Mäskäw bürosı citäkçese Äqram Xazam, İnterfaksqa xäbär itep, totıq aluçılar belän söyläşülärdä Ğiraq kommunistları partiäse wäkilläre dä qatnaştı dip belderde. İtaliä tışqı eşlär ministrlığı da kiçä Ğiraqta dürt İtaliä watandaşı yuqqa çıqtı dip xäbär itä. Annan alda Äl-Cäzirä videoyazma kürsätep, anda töşerelgän keşelär totıq itep alınğan İtaliä watandaşları dip raslağan ide. Totıqlarnı aluçılar Ğiraqtan İtaliä gäskärlären çığarunı taläp itä.
