Äfğanstannıñ tönyaq-könbatıştağı Ğor wilayätendä tärtip urnaştıru maqsatı belän, Äfğanstan armiäseneñ 600-läp xärbie bügen wilayäteneñ başqalası Çağçaran häm hawa alanına kilep urnaştı. Batalion komandirı general Äminulla Ptiani süzlärençä, alarğa ber qarşılıq ta kürsätelmägän. Uzğan atnada ğisyanşılar bu şähärgä basıp kerep, andağı xakimne quıp cibärgän ide. Äfğanstannan kilgän tağın ber xäbärdä äytelgänçä, 2 atna elek tönyaqtağı Qondız şähärendä 11 Qıtay eşquarın üterüçelär İslam suğışçıları tügel, ä alarnıñ biznes köndäşläre bulırğa mömkin. Qıtaynıñ Sinxua agentlığı, Qondız xakime Mäxämmät Omar'nıñ süzlären kiterä. Anıñ süzlärençä, Qıtay şirkätenä Dönya bankı eş birgän bulğan. Üterüneñ säbäbe şul kontrakt öçen köräş bulırğa mömkin.
