Äfğanstan başlığı Xämit Qarzay 9 üktäbergä bilgelängän prezident saylawlarına qädär wazifalarınnan kitü taläben kire qaqtı. Anıñ kitüen 12 köndäşe taläp itä. Alar arasında töp köndäşe älek mäğärif ministrı bulıp äşlägän Yunıs Qanunıy da bar. Ägär dä Qarzay kitmäsä, alar saylawlarğa baykot belderergä cıyına. Saylawçılarnıñ tawışların kübräk cıyu öçen Qarzay eş urınınnan faydalana dip belderä alar. Qarzay taläpne konstitutsiägä qarşı kilä dip äytte häm üze genä nämzät bulıp qalğan oçraqta da barıber saylawlar ütäçäk dip östäde.
