16 yäşlek fälestinle bügen Tel Aviv bazarında üz üzen şartlatıp 3 İzrael keşeseneñ ülüenä, 32 keşeneñ yaralanuına säbäp buldı.
Fälestin avtonomiäse citäkçese Yasir Arafat Parij yanındağı xärbi xastaxanädä däwalana. Üz yardämçese aşa ul höcümgä kisken täñqit belderde. Ramalladağı fälestin ministrı Saeb Erekat ta şulay uq tınıç xalıqqa qarşı höcümne täñqitläde: "Bu höcümne, tınıç keşelärgä qarşı qılınğın başqa höcümnär kebek ük täñqitlibez. Xalıqara cämäğätçelekne, tınıçlıq prosessın yañartır öçen çaralar kürergä çaqırabız. Bu – zolım çorın tuqtatunıñ berdän ber yulı," dide Erekat. Fälestinne Azat İtü Xalıq Frontı höcüm öçen cawaplılıqnı üz östenä aluın xäbär itte. İzrael-Fälestin nizağınıñ iñ yäş intixarçılarınıñ berse, 16 yäşlek Eli Amer Alfar – Askar qaçaqlar lagerennan bulğan. Soñıraq Askar lagerenda 12 yäşlek malay atıp üterelgän. Tabiplar süzlärenä qarağanda, malay İzrael xärbilärenä taşlar atqan bulğan. İzrael premyer-ministrı Ariel Şaron, fälestin xakimiätendä ber ni dä üzgärmägän, dide: "Höcüm – Fälestin avtonimiäsendä üzgäreşlär bulmağanın kürsätä. Alar terrornı tuqatu häm terror oyışmaların yuq itü öçen effektiv çaralar kürä başlağançı – İzrael üz säyäsäten däwam itäçäk. Bez süzlär, täñqit belderülär häm wağdälär belän qanäğät tügel. Fälestinnärneñ quyılğan burıçlarnı ütäwen taläp itäbez," dide Şaron.
