Ğiraq eçke eşlär ministrlığı matbuğat wäkile, bügen Bağdadtan könyaqqa taba 50 çaqrımdağı İskändäriä şähärendä Milli Gvardiä xärbiläre yanında maşinağa quyılğan bolba şartladı, dip belderde. Tabiplar, 3 keşeneñ hälak buluı, 15seneñ yaralanuı turında xäbär itte. Falluca tabibı Ahmed Mohammäd, Reuters mäğlümat agentlığına, soñğı amerikan hawa höcümnärendä 5 keşe, şul sanda ber xatın-qız häm bala hälak buldı, dip belderde.
Amerikan ğaskärläre Fallucada zur xärbi çarağa äzerlänä digän xäbärlär bar. Bügen "çiklärne tanımağan tabiplar" isemle xalıqara yardäm oyışması üzeneñ Ğiraqtağı eşçänlegen tuqtatuın belderde. Keşe ğömerenä qurqınıç yanağanda eşne däwam itep bulmıy, dide tabiplar. Oyışmanıñ Belgiädäge başlığı Gorik Ooms, oyışma üz xezmätkärläreneñ iminlegen tä'min itä almıy, dip belderde. Bu xalıqara oyışma Ğiraqta 2002nçe yılda birle eşli ide. Bügen Çexiä parlamentı Basra yanındağı üzeneñ 100gä yaqın xärbien kiläse yılnıñ fevral ayı azağına qadär Ğiraqta qaldıru öçen tawış birde. Şulay uq parlamentnıñ yuğarı palatası ildä professional xärbi köçlär buldırunı xupladı. Älege xärbi reforma prezidentnıñ qul quyın kötä.
