Fransiä prezidentı Jacque Chirac süzlärenä qarağanda, Ğiraq ilbaşı Ğazi al-Yawar Fransiägä çaqırunı qabul itkän. Brüsseldä çığış yasağanda Chirac, Ğiraqta saylawlar bilgelängän waqıtta uzırğa mömkin, dip belderde: "Berläşkän Millätlär Oyışmasınıñ 1546nçı sanlı rezolüsiäse Ğiraqtağı çirattağı säyäsi üzgäreş häm xalıqara ğaskärlärne çığaru waqıtın bilgeläde. Bolarnı xörmät itergä häm ütärgä kiräk. Saylawlarnı aldan bilgelängän waqıtta ütkärü bik möhim, häm tawış birügä Ğiraq cämğiäteneñ barlıq qatlamnarı qatnaşırğa tieş. " dide Chirac. Şuşı çığışınnan soñ Fransiä prezidentı Abu Dhabi'ğa Berläşkän Ğaräp Ämirlekläre prezidentı Şeix Ziyad bin Sultan al Nahayan'nıñ cänazasına kitte. Bügen Yevropa Berlege citäkçeläre häm Ğiraq premyer-ministrı İyad Allawi qatnaşında ütkän köndezge aş mäclesendä qatnaşmawın, Jacque Chirac – naçar mönäsäbät itep añlamasqa çaqırdı. Yevropa Berlege räise wazifasın ütägän Hollandiäneñ tışqı eşlär ministrı Bernard Bot, Germaniä häm Fransiä Ğiraq premyer-ministrınıñ kiçä äytkän süzlärenä açulı ide, dide. Kiçä Allawi moñarçı Ğiraqnı küzätep kenä torğan "qayber" illärne Ğiraqnı tözekländerergä öleş kertergä çaqırdı. Yevropa Berlege şulay uq Ukrainada uzğan saylawlarnı täñqitläp, noyaberneñ 21dä ütäçäk tawış birüneñ ikençe turı – irekle häm ğadel bulaçağına ömet belderde.
