Accessibility links

Кайнар хәбәр

Bäyrüttä qatı şartlaw näticäsendä Livannıñ elekke premyer ministrı Rafiq Häriri hälak buldı


Diñgez yarı buyındağı rayonda Harir utırğan häm ozata baruçı maşinalar uzıp barğanda maşinağa quyılğan bomba şartlap Häririnı häm tağın 9 keşene ütergän. Yözgä yaqın keşe yaralanğan. Livandağı kiñküläm mäğlümät çaraları äytüençä, şartlawdan soñ Häririne xastaxanägä alıp barğanda ul yulda ülgän. Yaralanuçılar arasında elekke mäğärif ministrı Samir äl-Jisr häm elekke iqtisad ministrı Bassil Fläyxan da bar. Alarnıñ ni xäldä buluı älegä açıq tügel. Şartlaw bulğan urında tirän çoqır xasil bulğan, tirä yaqtağı binalarğa zur zıyan kilgän, maşinalarğa ut qapqan. Livandağı xäbärçelär äytüençä Haririnı maxsus üterergä telägännär bulırğa oxşağan. Ämma anı kem üterergä telägän bulu mömkinlege bilgesez. Älegä beräw dä cawaplılıqnı üz östenä almadı. Sönni Hariri 1989-nçı yılda tämamlanğan watandaşlar suğışınnan soñ xakimiätkä kilgän liberal säyäsätçe ide. Ul suğışta cimerelgän bäyrütne tözekländerü eşlären citäkläwçe bularaq ta mäğlüm. Häriri miliarder käsepçe ide. Uzğan yılnıñ üktäberendä ul xökümättän çigensä dä Livanda tä'sirle säyäsi zat bulıp qaldı. Ğahirädä Ğäräp Ligası general' sekretare Amr Mussa bolay dide.

AUDİO: Ğömeren Livanğa, Ğäräp dönyasına, urtaq ğäräp eşenä häm urtaq ğäräp mänfäğätlärenä xezmät itügä bağışlağan böyek ğäräp citäkçese häm bik xörmätle Livandlı şäxes Rafiq Häririne yuğaltuıbızğa min bik qayğıram.

Süriä prezidentı Bäşär äl-Assad häm İran tışqı eşlär ministrlığı bu höcümne ğäyepläp çıqtı. Fransiä prezidentı Jasques Chirac şartlaw uñayınnan tikşerü ütkärergä çaqırdı.
XS
SM
MD
LG