Accessibility links

Кайнар хәбәр

Ukraina premyer-ministrı Yulia Tımoşenko comğa könne Mäskäwgä barmıy


Ukraina ministrları, xökümät başlığı Yulia Tımoşenko comğa könne Mäskäwgä barmayaçaq, dip belderde. Säfär comğa häm şimbägä bilgelängän ide. Premyer-ministrnıñ matbuğat wäkile Vitaly Çepinoga, Rusiägä barmawnıñ säbäbe – prezident Viktor Yuçenkonıñ xökümät başlığına, yazğı çäçü eşläre tämamlanğançı çit illärgä kitmäskä kiñäş itüe, dip belderde. Ukraina iqtisad ministrı Sergei Teryoxin, häm Rusiä mäğlümat agentlıqları , Tımoşenkonıñ Mäskäwgä barudan baş tartuınıñ säbäbe – Rusiä prokurorlarınıñ anıñ östennän ğayepläwlärne almawı, dip belderä. Tımoşenko, Ukrainada gaz şirkäte başında torğanda Rusiäneñ saqlanu räsmilärenä rişwät birüdä ğayeplänä. Üze ul bu ğayepläwlärne kire qağa häm alarnıñ säyäsi säbäbe bar, di. Rusiä tışqı eşlär ministrı Sergei Lavrov, Tımoşenkonıñ kilüenä ber nindi dä kirtä yuq, dip belderde: "...Bez Ukraina premyer-ministrı häm prezidentı belän böten ölkädä kiñ xezmättäşlekkä äzer," dide Lavrov. Kiçä Rusiäneñ general prokurorı Vladimir Ustinov, ğayepläwlär ğamäldä qala, häm Tımoşenkonı qulğa alu turında xalıqara färman äle dä köçendä, dip belderde. Ämma Ukraina premyer-ministrı Rusiädä qulğa alınmayaçaq, däwlät citäkçeläreneñ qağılğısızlıq xoquqı bar, dip östäde Ustinov.
XS
SM
MD
LG