Bügen kötelmägän säfär belän Ğiraq başqalasında Berläşkän Millätlär Oyışması general sekretare Kofi Annan bulıp kitte. Premyer-ministr İbrahim Cağfari belän berlektä uzdırğan matbuğat oçraşuında Annan, BMO Ğiraqnı totrıqlandıruğa iğtibarnı kimetmiäçäk, dip belderde. "Bez xökümätkä säyäsi küçeşne yomşartu eşendä yärdäm ittek, häm älbättä bez saylawlarğa äzerlek mäsäläsendä dä bergä eşliäçäkbez. Ğiraq kiläçäge, totrıqlı häm tınıç cämğiäte öçen cawaplılıqnı üz qulına alğançı bezneñ xökümät häm Ğiraq xalqı belän eşne däwam iter öçen İminlek Şurasınıñ açıq qararı bar," dide Annan.
Şulay uq BMO citäkçese ildäge şiğilär, sönnilär häm kördlär arasında kileşünıñ dä ähämiäten azsızıqladı. Kiçä kiç Baath partiäseneñ internet säxifäsendä, Saddam Hösäinneñ elekke urınbasarı İbrahim ad-Dourinıñ üleme turında xäbär itelgän ide. Bäysez çığanaqlar monı raslıy almadı. Bügen Bağdadtnıñ könçığışında bazarda, maşinağa quyılğan bomba şartladı. Polisiä xäbär itüençä, kimendä 4 keşe häläk bulğan, 20se yaralanğan.
